Billboard 200-ah Morgan Wallen ‘One Thing at a Time’ a la No.1

Billboard 200-ah Morgan Wallen ‘One Thing at a Time’ a la No.1
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a zawna kar li a No.1-na a ni ta. Hetihrual hian BTS member Jimin, Lana Del Rey, Luke Combs leh Fall Out Boy te pawh chart top 10-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin copy 1,97,000 an hralh leh a, chung zinga 1,77,500 chu streaming atanga album hralhna tlukpui (on-demand official stream maktaduai 235.76) niin, album tak tak hralh zat chu 17,000 a ni a, album-a hla mal hralhna atangin 2,500 a tling thei bawk.
Mipa zaithiam album a zawna he chart-a kar li chin No.1 thei hnuhnung ber pawh Morgan Wallen album tho niin, a album ‘Dangerous: The Double Album’ chu January-March 2021 kan kar li chhung a No.1, he album hi a zawn ni kher lovin kar 10 a No.1 a thei nghe nghe a, heti hian a album pahnih ‘Dangerous’ leh ‘One Thing at a Time’ te No.1 chhung belhkhawm hi kar 14 a tling ta a, Bad Bunny nih rualin, tun kum 10 thara he chart-a No.1 nih rei-ah pahnihna a ni a, album panga hmanga kar 20 No.1 thei Taylor Swift chiah a pha lo.
BTS member Jimin solo debut album ‘FACE’ chu copy 1,64,000 hralhin No.2-ah a debut a, 1,24,000 chu album tak tak hralhna niin, streaming atangin 13,500 (on-demand official streams maktaduai 19.51) leh album-a hla mal hralhna atangin 26,500 a ni. He album a hlate hi Korean deuh vek niin, hla paruk ‘Face-off’, ‘Interlude: Drive’, ‘Like Crazy,’ ‘Alone,’ ‘Set Me Free, Pt. 2’ leh ‘Like Crazy (English Version)’ te a awm. Jimin hi K-pop group BTS member pasarih zinga solo anga Billboard 200 chart-a lang thei pathumna niin, BTS member dang RM leh J-Hope te pawh an lo lang tawh a. RM hian nikum December khan a album ‘Indigo’ chu No.3 kai puiin, 2018 khan ‘Mono’ chu No.26 a lo kai pui tawh bawk a, J-Hope pawhin nikum July khan ‘Jack in the Box’ chu No.17 kai puiin, 2018 khan ‘Hope World’ chu No.38 a lo kaipui tawh bawk. Heti hian Jimin hi BTS member zinga solo anga he chart-a thleng sang ber a la ni.
Lana Del Rey album thar ‘Did You Know That There’s a Tunnel Under Ocean Blvd’ chu 1,15,000 hralhin No.3-ah a debut a, 87,000 chu album tak tak hralhna niin, streaming atanga album hralhna tlukpui 28,000 (on-demand official stream maktaduai 36.14) a ni bawk. Lana Del Rey hian he chart top 10-a lang thei album pakua a nei tling ta a ni.
Luke Combs album thar “Gettin’ Old” chu 1,01,000 hralhin No.4-ah a debut a, 32,500 chu album tak tak hralhna niin, streaming atangin 66,000 (on-demand official stream maktaduai 85.4) leh album-a hla mal hralhna atangin 2,500 a tling thei bawk. Luke Combs hian he chart top 10-a lang thei album panga a nei tling ta a ni.
Chart No.1 hlui SZA ‘SOS’ chu 70,000 hralh lehin No.2 atangin No.5-ah a tawlh a, Fall Out Boy album thar ‘So Much (for) Stardust’ chu 64,000 hralhin No.6-ah a debut a, an band album chart top 10-a lang thei pasarihna a ni a, 2018-a an No.1 album ‘MANIA’ hnua album an tlangzarh leh hmasak ber a ni.
Chart top 10-a lang album dang pawh chart No.1 hlui vek niin, Taylor Swift ‘Midnights’ chu 59,000 hralh lehin No.3 atangin No.7-ah a tawlh a, Metro Boomin ‘Heroes & Villians’ chu 45,000 hralh lehin No.8-ah bawk a la awm a, Morgan Wallen ‘Dangerous: The Double Album’ chu 43,000 hralh lehin No.7 atangin No.9-ah a tawlh a, Karol G ‘Mañana Será Bonito’ chu 40,000 hralh lehin No.6 atangin No.10-ah a tawlh ta bawk.