MIZORAM EI RAL MEKTU NGAIH DANTE (IDEOLOGIES) VEI A HUN

Rinsanga

Khawvel awm tirh atanga lo awm tawh ngaih dante hi mihringte min kaihruaitu ber an ni thin a. Ngaih dan inang lo tak takte avangin ram leh mihringte pawhin hmasawnna kan nei thin. Chung ngaih dan lo awm tawhte chu a inthian zel a, a hmasawn zawng te, a hnungtawlh zawngte leh a dik vak lo zawngtea a inher danglam chang pawh an awm thin. Socrates, Plato leh Aristotle hunte an liam a, anni hnuah pawh chuan heng – Karl Marx-a ngaih dan, John Locke, Antoine Destutt de Tracy te, Edmund Burke te, Antonio Gramsci te, Adam Smith-a ngaih dan, Gandhi-a ngaih dan, Martin Luther-a ngaih dante bakah tunlai lehzualah pawh anni atanga zi chhuak zel, left leh right, communism leh democracy te, socialism leh corporatism lam hawi ngaih dante hian khawvel hi a tuam hlup hlup reng a, ram leh ram induna te, tualchhung buaina leh helna hrang hrang pawh heng ngaih dante hian a hring nasa hle.
Mizoramah ngei pawh hian heng ngaih dan hrang hrangte hi a mikhual ta lo hle a, a bikin duh fir leh conservative em em thin atangin thiangzau leh pawm awlsam ta viau, duh maksak sawt ta deuh kan ni chho mek a nih hi.
Pathian thu lam
Mizoram Bible zirna college pakhata Principal thin phei chuan Isua/Pathian hi mipa anga sawi a duh lo a, ‘Our Father’ tih pawh hi a sawitir duh loin, a thlak danglam te an ti a, a feminist ideology avangin Pathian pawh mipa ni loin, hmeichhia ang hial ten a chhuah a ni ti tein an sawi. Ram hrang hrang mythologies te nen la kawpin, creator, Mizote pawhin Khuanu kan tithe pawh female an ni zel a, Pathian pawh mipa anga sawi hi a dik loin a ring e an tih chu! Chutiang ngaih dan maksak tak, tam tak tana pawm ve mai awl takte chu an kohhran Bible zirna hmunah a kalpui tih hria se a kohhran mipuiten engtin tak ngai ang maw? A hria lah chu an kohhran member zawng zawng atanga zaa sawm pawh an tling awm si lo a. Chung ngaih dan chuan an future pastor te a lo hrual vek tawh chu a ni si a le! Feminism te hi a lo chhuah chhan leh a pawimawhna bak piah lama a dik a dawk thlu loa lek a nih hi chuan a lo va hlauhawm thei ta em. Mizorama tuai leh anpui kawp pung lutuk te, sual langsar kan ngah sawtzia hi kan Pathian thu pawm kalsual nghawng a ni.
Chutiang Zelin Mizoram atanga Bangalore leh khawpui danga zirna sang bela kalte hi Left ideology in a chhum hmin Universities lamah an Master te, Doctoral degree te an zir fo a, chungah chuan an va in chhum hmin tha thei hle bawk a ni awm e. Chutianga kalte chuan a tlangpuiin Pathian khawngaihna “Grace” an chawi vawng vak phawt ang a, Pathian chu mi rethei lam awn, Mi retheite Pathian a ni, tih an pawm tlur mai a, mi hausa tan hauh lo ang deuhthawin an chhuah ang, chu bakah Liberal theology tih duh loin, Liberation theology te an rawn tuipui chho em em ang a, Isuan midum ho a hmangaih dan te, Dalit ho a hmangaih dan te, mi te leh hnuaihnung ber berte a duhsak bik dan theology changchawiin Pathian thu pawimawh chhandamna erawh an hlat a, a tepen social gospel leh liberation theology an tihah chuan an tui em em zel a. Chung chuan a hnuah mipuite fuihpawrhna angreng a siam duh khawp mai a, society-a kalphung tha tak kan lo neih sate entir nan mipa leh hmeichhia te (division of labor) hna thawh tur insemzai tha sa em em Mizo khawtlangah pawh kan neih ang, entirnan Hmeichhiain ei an rel a, mipain lo lamah ei te an zawng a, hmeichhiain tui an chawi a, mipain lo an vat a, hmeichhiain thali an thlak a, mipain mang an khawh a, chutianga kan kalpui, hnuaihnung bik awm hran lo mahse insemzai tha si kalphung chu hnawk an ti a, feminism changchawiin Mipa tih ang tih ve a, hmeichhe tihthinte hnualsuatin, dinhmun hniam hnaa ngai an awm ta tlat a. An hna ropui ber fate enkawl leh mipa te tih ve theih loh hnute hmanga chawm te, thla 9 ngawt paite hi a ropui bik nen, an nihna leh an hnaa lawm lohna ideology chhia chuan a pe a, mipate thikna leh khakna a tuh a, chhungkua leh nun a tibuai ta thin a ni. A bikin Marxism hi chu a root hi Atheism a ni a, Pathian duh lem lo ideology a nih avangin a hlauhawm hle.
A tuipuite hi
A tlangpuiin College zirlai leh master zir tantir hi Left an tui duh khawp mai, kan thianpa sawi angin left chu kan la mature hmain kan ni a, kan puitling a, khawvel kan hre chianga kan kalsan mai zel a ti. Chutiang deuh chu a ni, JNU khi India rama leftist bu pui a ni, mahse an kallai bak hi an left rei peih lo, system in a eiral lam a ni lo, khawvel kalphung dik takt e, applicable leh feasible zawk an hre chiang a, mumang rama awm reng kha tul an ti lo mai zawk a ni. Chuvang chuan I naupan laia khatiang ngaih dan I nei kha kan dem lo che a, a tha e, a hunlai a ni, mahse ziak vak vakin au vak vak suh, chi bur khat pawh i chhungten i kutah an la dah lo, i kuta chhungkua a tlak ve hunah zet zawng leftist tihvel kha chuan i ngaihtuahna a luah hman bik kher lo ang le. I la hmanin, i la thawveng ve rih a nih kha.
Tin, hetiang zirlai ni lo lehah chuan sorkar hna thawk, nun nuamsa angreng ho hi an left leh duh a, a chhan chu competition em em ngai loin hlawh an la reng a, an thawk tha emaw, thawk chhia emaw a danglam lo a, an hlawh a kiam loh avangin khawvelah hah leh rim takin nun an hmang lo a, an eikhawp an thar awlsam avangin hunawl leh hetiang thil awlsam lam support na an ngah a, an left tam leh angreng. Chutiang ni ve lo, mahni kut zala hna thawk a, sorkar ring loa chhungkaw chawm tumteah hian leftism vel hian hmun a chang lianin a rinawm loh leh bawk.
Khawtlang a nghawng
Khawtlangah nasa takin a lut mek a, kan social activist inchhiar zau lem lo, lar duh ve bawk site an fuihpawrh a, an inlak chhiar zauna leh an inlak thiamna hmangin tu tutee maw an dawi ve mai zel a, chung chuan sorkar laka helna ni awm tak tak revolution movement ang chi support na thangah a hruai lut a, Mizo khawtlang a dan chhe ber chi a huhoa thil nawr thluk leh cancel culture te an rawn ken glut a, Gen Z tihvel fuihpawrh chung zelin society an ei ral mek a ni. Tun hnaia kan social activist intite hmalakna hi Mizo mipui tam zawkin kan support mang hauh lo hlauh zawk a, hmanni deuha ATM bomb tu thlavang hauh tlat te, violence support tlat mirethei rahbeh leh hnuaichhiah kan ni tih changchawia pawi khawihtu hum duh tlatna te ang chi kha left ideology hlauhawmna a ni. Chu chu History ah a takin hmuh tur kan nei, Karl Marx a ngaih dan a thawh tak tak lohzia te, Stalin te, Lenin te, Hitler te chenin khawvel history-ah an thiltih rapthlak tak tak kan hmu reng si a, Communist ideology chhiatzia hi sawi ngai loin a chiang reng a ni.
A that lohna a chiang vek tawh
Chutianga chiang lutuka history a a hlauhawmzia kan hmuh bakah sorkar inrelbawlnaah awmzia a nei tak tak lo a ni tih lanna chu Israel ramah apply thin niin, a hnuah Capitalism ah an inlet a, hma an sawn chauh a ni, Rusia hi communist ram tih ni mah se, an economy hi ‘hybrid model’ niin, ‘state capitalism’ emaw ‘coercive statism’ tiin an sawi thin. ‘Private ownership’ niin state control strategy tho apply in an chawhpawlh thiam a, chuvanga hausa chho an ni. Socialist hlang nih an duh tawh teuh lo. Chutiang zelin China pawh khi communist ram niin sawi reng mah se, an economy erawh 1970 chho atang tawhin tunlaina hmanga kaihhruai a ni a, ‘Three tier enterprise system’ an tih hamngin hybrid local leh foreign investors te zalen taka chettirin, private enterprise an chawi kang a, chu vanga hausa chho an ni. Maoism atangin hmasawn dawrhin macro control policy kalpui chungin an capitalist chho hle reng a nih khi. Chutiang zelin keini India pawh – 20th century ah, leftism hi a rawn lar a. Untested a nih avangin India a kan founding fathers te pawhin 1947 vel chuan an lo awn a. India kan retheih rei phah a. Chutih rualin wealth distribution ngaih pawimawhna chi angin India mite rilruah an tuh tha ve tho a. =hatna chin a awm. Reservation leh Welfare States policies. Amaherawh chu India heti khawp a kan retheih reina hi leftism hi a ni a. A pawi hle bawk. Chuvang chuan 1991 khan insiamremna runpui economic liberalization a kalpui a, License Raj titawpin India ram chu market driven economy a lo ni chho ta a ni. LPG policy heng – Liberalization, Privatization leh Globalization chu thupui lian tak niin, Foreign investment te, International Monetary Fund (IMF) atanga tanpuina dil te, Financial reform kalpuiin private bank te an hawng chho nasa hle a nih kha. Chuvang chiah chuan india chu khawvela economy thang duang ber pahnihna rawn ni chhoin, GDP thanna pawh 1991 a Dollar 266 Billion ni kha, 2018 ah chuan Dollar 2.3 trillion ah a kai dawrh a ni. Duhthusam vek chuan kan la awm lo a, kan hausak dan te pawh a rual vek kher rih lo, mahse 1991 hmaa India kha chu a chhe tak zet a, 1991 hnua India hi tupawhin kan thlang zawk ngei ang.
Zawhna awlsam te, “South Korea-ah nge North Korea-ah I awm duh” tih te, “America-ah nge Russia-ah hna I zawn duh” tih te hian a hlawhtling zawk chu a sawi chiang viau a, history hian a proof hneh hle mek lai hian naupang leh la hre thui lo zawkteah a ngai te bawkin communist leh left ideology sawi mawina a lo intan leh thin hi a buaithlak ngawt mai. West Bengal hmana India ram ropui lai ber hma a sawn vel oh chhan te khu Communist ho rorel rei vang vek khu a ni si a.
American founding fathers te, American Declaration of Independence ziak tute, mi ril, tun thleng a khawvelin an thuziah kan la zawm leh UK a Magna Carta ti chhuaktu leh a lo pian hun laia mite, tin a hnu deuh a enlightenment thinkers leh philosophers vawiina kan nunphung rawn thlentu thinkers ropuiho te etc. khawvela scientific enquiry ti chhuak a, civil rights ngai pawimawh, modern democracy piantirtute leftism awn an awm ngai lo. Tun ah phei chuan, time tested a ni tawh. Leftism pawm bur chu, tlemin Global Politics 1980s hnu lam an chhiar zau lo deuh a ni mai thei.
Chubakah Mzio zinga influencer ve deuhreh, IG leh FB vela followers ngah te hian zak map loin Hitler an chawi vawng ngam a, Communist hla leh an symbol te story leh post velah te an han tehh darh kual a, an thlalak nen tea la kawpin an han tar lang duh hi anni tluk zeta hre lote lakah lang cool in fin hmel mah se, a hre zawk leh dai zau zawkte tan chuan nuihzatthlak a tling ve ngeiin ka ring. Socialist ideology avangin reservation te, minorities duhsakna dan eng eng emaw lo awm hi a tha ve lutuk ang, mahse, ram leh hnam khai chhuah nan minority politics emaw regional politics chawi vawng reng hi awmzia a awm lo tih Mizote ngei pawhin kan hria, Lawngtlai khian Lai politics tuipui tlat se, Siaha hian Mara bak nih duh lo zel se, kan Mizoram politics a chiri zel ang hi a ni ber e. The dark side of leftism kha 1980s hnu lam hian a in manifest nasa a. Tun a woke culture phei chu, a langa violent si loin, culture an invade nasa a. Soft cultural revolution a rawn piantir a, woke cultur leh cancel culture hian min ei khaw lo nasa mek zel bawk. A nuance read thiam tan chuan, a intellectual depth awm lohzia hi a lang chiang viauin ka hria.
Chuvangin hawh u, society kalphung leh culture ei chhe thei ngaih dan eng eng emaw hi inlak fin leh changkan tum hian i bawh huam tawh lo the ang u. Chutiang sawi thinte lah hi Karl Marx-a lehkhabu chhiar chhuak an vang duh viau zel lehnghal a, kan nula tlangval thangthar lo awm zel turte History a tha lo tawh sa reng khukpui reng hi a Gen Z changkang lo chi style em a, i simin, a tha sa, ram leh hnam hmasawnna kawng hi i kalpui zawk ang u hmiang.