Indian Super League: Odisha hnehtu East Bengal-in palina luah chho

Thawhlehni khan Margao lama inbeihnaah East Bengal FC chuan si thum faia Odisha FC hneh chungin Indian Super League table-ah hma an sawn a, palina an luah chho.
East Bengal goal hnih hi Bipin Singh Thounaojam leh Youssef Ezzejjari-te thun niin, Kolkata giants lamin game an thunun hneh viauna inkhelah hian tan atanga minute 11-na lekah Bipin Singh chuan goal hmahruai khungin, second half minute 70 leh 84-ah Ezzejjari goal hnih hmuh tur a awm zui ve leh.
Odisha FC lamin an khelh that thin dan an pha lo a, table-ah 13-na an luah chhunzawm.
Red and Gold Brigade hian khelh kuaah point 18 humin top four an luah chho a; Odisha FC hian match kuaah point ruk bak an la hlawhchhuak zo lo thung.
Goal khat thuna assist vawi khat siamchhuak bawk Bipin Singh hi kha game-ah khan a khel tha bawk a, Man of the Match atan thlan a ni.
Mualneitu team tan Edmund Lalrindika chuan first half minute thumna lekah goal thun theihna hun remchang hmu mah se a bawhpelh a; minute 11-na a kal mek laiin vei lam sira Lalrindika leh PV Vishnu thawkdun chuan far post lama ven loh Bipin Singh-a tan ball an chhawpsak a, goal ruakah East Bengal hmahruaina goal tihluh a ni.
East Bengal lam hian hmahruaitu an nih hnuah pawh nuamsaa ball thununtu zawk ni chungin attack lam an buaipui chhunzawm zel a; Odisha tlarhnung thuk zawk lakah fiahna hraw tak tak an pho chhuak chhen a, tah chuan a sir lamah Vishnu a hnawk tluanchhuak a, a laiah Nandhakumar leh Saul Crespo-te’n Odhisa tlarhnung tan harsatna an thlen ve reng bawk!
Odisha lam hian counter-attack hun remchang hmu ve zeuh zeuhin, Rahim Ali chuan goal thun tum eltiang ve viau mah se first half-ah East Bengal keeper Prabhsukhan Gill chuan ball hlauhawm hmachhawn tur a nei bar lo.
Second half kalphung pawh a danglam teh chiam lo a, East Bengal bawkin game an pumbilh leh a, Odisha game a kang thei chuang lo.
Tarlan tawh angin, East Bengal tan substitute Youssef Ezzejjari chuan goal hnih khung belhin, he Moroccan forward goal hnihnaah hian substitute ve tho Mawihmingthanga pawh thuk takin a inrawlh a, a pass fuh tak umlutin Bipin Singh chuan dinglam sir atangin Ezzejjari tan ball a siam chhuak.
Bengal goal thumna a luh hnuah Odisha hian an si phurh pakhat tal sut then tumin thapui han chhuah ve bawk mah se an chance tha ber hmutu captain Carlos Delgado chuan goal ban sirah a tauh chhuak a, East Bengal-in nuamsain point thum an hlawhchhuak.