Justin Bieber-a’n a vawi khat nan Billboard Hot Christian Songs-ah Top 10 a kai

Justin Bieber-a’n a vawi khat nan Billboard Hot Christian Songs-ah Top 10 a kai
Justin Bieber hla ‘Everything Hallelujah” chu Billboard Hot Christian Songs chart-ah No.6 a kai a, he chart top 10-a Bieber lan vawi khatna a ni. He hla hian kar khat chhungin official US stream maktaduai 2.4 leh sales 1,000 a nei thei. He hla hi Christian Streaming Songs-ah No.1 a kai bawk a, he chart-a Bieber a No.1 vawi khatna a ni bawk.
“Everything Halleluijah” hi Bieber-a ‘Swag II’ project a mi niin, Coachella-ah April ni 11 leh April ni 18 khan a perform tel a, hei vang hian a lar ta riau a, TikTok lamah a lar riau bawk. Bieber-a ‘Swag’ hi nikum July thla khan tlangzarhin, Billboard 200 (US albums) chart-ah No.2 a kai a, chutah September thlaa a album chi tilianin, hlathar a dah belh a ‘Swag II’ a tlangzarh a, “Everything Halleluijah” pawh hi Swag II project-ah hian a telh a ni.
Bieber hian Hot Christian Songs chart-a lang thei hla hi pahnih khat chu a lo nei tawh a, 2021-a a album ‘Freedom’ kha Top Christian Albums-ah pawh No.3 a kai thei a, he album a hla ‘Beam’ chu Hot Christian Songs-ah No.20 kaiin, ‘Where Do I Fit In” featuring Tori Kellu, Chandler Moore leh Judah Smith chu No.22 a kai a, “Where You Go I Follow” featuring Pink Sweat$, Moore & Smith chu No.25 kaiin, “We’re In This Together” chu No.29 a kai tawh bawk.
Bieber hi Billboard chart hrim hrima a lanna hmasa ber chu 2009 kha niin, heta tang hian Billboard 200 (albums) chart-a lang thei album 13 a nei tawh a, chung zinga album 11 chu top 10 kaiin, pariat chuan No.1 an kai thei nghe nghe a ni. Billboard Hot 100 (US singles) chart lamah pawh top 10-a lang thei hla 27 nei tawhin, No.1 kai thei hla pariat a nei tawh bawk.