EXIT POLL: BJP-in Assam leh Bengal, Tamil Nadu-ah DMK, Kerala-ah Congress

Indian Prime Minister Narendra Modi-a kaihhruai BJP leh an kaihhruai tangrual pawl chu state pali assembly inthlan zinga pahnihah hnehna chang tura ngaih a ni a. Nilaini zana exit poll-ah hei hi langin ram puma party thuneihna a tichak thei dawn a ni.
Modi-a kaihhruai BJP hian kum 2024 Lok Sabha inthlanpuia beisei loh taka party mala sorkar thei lova an awm hnuah state inthlanpui tam zawkah hnehna an chang zui a, parliament inthlan hnuah khan sorkar siam turin an thawhpuite rinchhan an ngai a ni.
Tun hnaiah India-ah hian khawchhak lama Assam leh West Bengal, chhim lama Kerala leh Tamil Nadu bakah sorkar laipui hnuaia awm, Puducherry-ah sorkar thar tur thlan kalpui a ni hlawm.
Nilaini khan vote thlak zawh fel a ni a. May 4-ah chhiar a ni ang a, hemi ni vek hian result pawh a hriat nghal theih dawn.
BJP kaihhruai tangrual pawl chuan tun hnai kum 10 chhung Assam-ah ro an rel tawh a. Tun tumah pawh hian a chak ber an ni leh dawn niin exit poll-ah chuan a lang a, term thum a zawnin thuneihna an chang thei dawn nia an sawi.
BJP-in rorel lai, Trinamool Congress party an hmachhawnna, West Bengal-ah chuan pollster tam zawk chuan BJP tan hnehna a awm dawn niin an sawi bawk.
Modi-a telin BJP hruaitu langsar tak takten West Bengal-ah hian chawlhkar enge maw zat campaign beihpui an thlak a. Trinamool Congress sorkar hnuaia an thenawm, Bangladesh atanga dan lova pem lut nia sawi an tam leh eibar dinhmun chhia chu an tlangaupui langsar tak a ni.
Electronic leh lirthei siam chhuahna hmun lian tak, Tamil Nadu-ah chuan rorel lai, regional DMK party kaihhruai tangrual pawlin a zawna vawi hnih nan hnehna an chang dawn niin exit poll-ah tar lan a ni ve thung.
Communist-ten ro an relna state awmchhun, Kerala-ah chuan Communist Party of India (Marxist) leh an tanrualpui leh Congress party kaihhruai eptu pawl karah inelna lian tak awm tur ang leh rorel lai hi a tlawm zawkah an tang thei niin exit poll-ah a lang.
India-ah hian exit poll-te hi record hrang hrang behchhana lak thin a ni a, ram chhunga vote nei tam leh thil dang dang nghawng awm thei avangin a dik lo ve fo thin.