Sawrkar leh NGO te thawh hona…
Mizo Zirlai Pawl Hnahthial chuan kar kal ta Inrinni zing khan an pisa-ah Hnahthial chhunga hnam dang (Vai) awm zawng zawng chhiarpui neiin a kokhawm a, mi 105 chhinchhiah an ni. Inner line permit an endik sak nghal a, ILP nei ngei ngei tur leh dan ang taka hna thawk a, Mizote nena tha taka thawk ho a, midangte tana hnawksaka awm lo turin an chah.
Hetih rual hian, hnam dang ILP sponsor-tute pawhin, an sponsor hnam dangte chu dan dik takin an thawk em, tih leh an ILP validity ngai pawimawh zual turin an chah nghal bawk a ni.
Sawrkar leh NGO thawh hona avangin ram leh hnam hmasawnna hmel duhawm tak tak hmuh tur a awm thin a, a awm mek mek bawk a; hei hi a lawm a ni.
Chutih rual chuan, sawrkar mawhphurhna leh tih tur ngawih ngawiha ngaih, NGO kutzala a tla thin hi thil tha ber a ni ang em tih hi ngaihtuah a ngai hlein a lang. NGO leh sawrkar thawh hona kan hmuh heng YMA leh PWD te, YMA leh Excise Deptt te, Education department leh NGO hrang hrang te, pawl leh sawrkar thawh hona hrang hrang dangah te pawh, thawh ho dan tur ziakin inremna siam a ni thin a, hengte hi kan thatpuiin hma pawh kan sawn phah bawk awm e. Hetianga thawh hona hnuaiah hi chuan, sawrkar lam aiawh leh NGO lam aiawh te inthurualin a huhovin an thawk thin.
Zirlai pawlte hian ram leh hnam tana tha tur an vei a, sawrkar nen pawh thawh hona tha tak an nei thin. ILP nei lo zawn chhuah kawngah te, hnam dang dan dik lova sumdawng zawn chhuah kawngah te, hma an la nasa thin hle a, ram leh hnam tan thil tha tak an ti a, an thawk a, an thawh hlawk hle a, a lawmawm hle a ni.
Hetih rual hian, tuna Hnahthial MZP ten hnam dang chhiarpui an neih chungchang thuchhuah an siamah, sawrkar thuneitute an tel leh tel loh tarlan a ni lo niin hriat a ni a; zirlai pawl te hian anmahni kutzalin an lo thawk ve mai niin a lang. Hei hi ram leh hnam tana thahnemngaihna thil a ni a, a lawmawm em em rualin, sawrkar lam hriatpuina leh sawrkar lama a kaihhnawih thuneitute nen han thawk ho thei se, Dan lam mit atang pawhin a him leh zualin a rinawm.
Sawrkar lam pawh hian, ram inrelbawlna thila dan kenkawhna turah, thawh hona hnuai ni si lovah, NGO-te inrawlh ngai khawpin an lo ngaihthah thin em tih te hi inenfiah thin se a tha phian lo’ng maw?