Italy-ah Inter an champion fel ta!

Italy-ah Inter an champion fel ta!
Tualchhung football league hmawrbawkna a hnai chho ta a, Bundesliga ang bawkin Italian Serie A lam pawhin champion thar hmel an hmu ve ta a, Pathiannia si hnih faia an mikhual Parma hnehtu Inter Milan chu champion-a puan an ni ta.
Inter hian game 35 an khelh tawh atanga point 82 humin, anmahni hnaihbertu Napoli tan lehpelh ngaihna an awm ta lo a, league khelh thum la awmah an tan Scudetto a hmin ta a ni.
San Siro club tan tun kha Serie A title 21 an lak tlinna chiah a ni.
Pathianni inkhela mualneitu team chakna goal hnih kha Marcus Thuram leh kum 37 mi Henrikh Mkhitaryan-te thun niin, first half hun pekbelhah France forward Thuram hian home team goal hmahruai thawhin, second half tawp hma minute 10 la awmah Lautaro Martinez siamsak atangin substitute ve bawk Mkhitaryan chuan chiang lehzuala Inter chakna goal a thun zui ve leh ta a ni.
Inter Milan kuta he title luh hnuhnunber chu kum 2024 kha niin, kumin hian defending champion Napoli laka point 12-a sang zawk chungin Serie A title an chhuhsak thei ta a ni.
Table-a 12-na luahtu Parma lakah khan Inter an chungnun hle a, mikhual goal zawnah tum 12 zet ball thawnlut tlingin, Parma-in hun puma shot vawi li an neihah tum khat mah target an fuh lo a; Inter khan chance hraw tak tak hlohin, ball pawh 59 an chang pha.
Inter Milan hian an match khelh hnuhnung vawi rukah goal 19 tehreng an thun tling a, match 35 an khelh tawhah tum 26 chakin, champion nih phu tak chungin an champion!