Everton in City an chelh

May 4, Thawhtan zan khan English Premier League 2025-26 khelh chhunzawm a ni a. Goodison Park a inkhel hmuhnawm takah Everton in champion tuma tan khawh Manchester City an chelh a, 3-3 in an inhnehtawk. Inkhel dangah Chelsea an khel chhe tluang a, an mikhual Nottingham Forrest lakah an tlawm.
Arsenal tana khel Everton
EPL ah champion tumin Arsenal leh Manchester City te an inel fal mek a, champion tur zawk rin thiam har khawpa inhnaihin, an ineltawk. Everton captain ni a, Everton manager ni mek David Moyes hnuaia lo khel tawh Mikel Arteta chuan Arsenal a enkawl mek. Moyes hian an captain hlui Arteta hi Arsenal champion pui ngei turin a duhsak hle. City an khelh hma hian Arsenal tan khel a, an theihna zawng zawng hlan turin a player te a hrilh thu a sawi a. City laka goal hnih thun Thierno Barry pawhin Arsenal tan chhungkua atanga seilian a nih thu leh Arsenal tan goal a thun thei chu nuam a tih thu a sawi ve bawk. Everton tan hi table laihawlah an awm a, chak leh tlawmin an tan kawngro a su tam tawh lo. Chuti chung chuang City hneh ngei tumin an theihna zawng zawng an hlan a, an tum ang ngeiin City an chelh a, Arsenal tan hna tha an thawk.
Jérémy Doku show
Goodison Park-a lenglut Manchester City tan champion thei turin chak a pawimaw tak zet a, chak ngei tumin tan an khawh bawk. Goal thun ngei tumin Everton an nawr char char a, Everton in an goal venhim ngei tumin tan an khawh ve char char thung a, game inang lo tak; inkhel hmuhnawm tak si hmuh tur a awm. City tan hian Jérémy Doku a khel tha tak zet a, a hmuhnawm thei hle. Bet reng mah se Toffees in an nawr let thut a, goal an thun hmasa teuh hle. Goal an chhuah teuh viau hnuin an insiamtha a, khel tha tak Jérémy Doku chuan minute 43-naah mawi zetin a pet goal a, hmahruaina goal thun ta nge nge.
Chawlhlawk hnu lamah Everton chu team thar ang maiin an inlan a, City nawr buaiin goal an thun teuh thei hle. Uiawm taka an hun tha neih an hlah zel hnuin an vannei ta nge nge. City defender Marc Guehi tihsual vangin bench atanga lut Thierno Barry chuan minute 68-naah awlsam takin a pet goal a, an si phurh a sut.
An si phurh an sut hian Everton player te a fuih phur tak zet a, Jake O’Brien chuan corner atanga ball kal chu fuh zetin a tauh goal a, hma an hruai letna goal a thun. Hma an hruai let hnuin Toffees an khel tha zui viau a, si an phurh vanga buai leh hnual City hi na takin an nawr. Hun tha neih belh bawk mah se Donarrumma an paltlang zo mai lova, goal an thun belh mai lo. Fuh taka an khingpuite nawr tlangin chiang zeta City tlarhnung an thiah hnuin Barry chuan minute 81-naah an goal thumna a thun a, an hmahruaina a tizau.
Chak mamawh taka chunga si hnih phur a, an tlawm ngei dawna a lan vangin City tantuten Goodison Park an chhuahsan tan hial tawh. Mah se game a la tawp lo. Goal thum an chhuah hnu lawkah Kovacic ball pek fing leh fuh zet mai chu goal hmaa hlauhawm bik Erling Haaland chuan a khalh tlang a, minute 83-naah class taka pet goal in an si phurh a sut then. Haaland goal thun hi City tantu khelmual chhuahsan mekte a kokir leh teuh nghe nghe.
Hun tlem la awmah tlawm pumpelh ngei tumin Manchetser City in tan an khawh a, hun pek belh tawpna minute 90+6-ah khel tha, hmuhnawm zet mai Jeremy Doku chuan pui zetin a pet goal nawn leh a, an si phurh a sut zo ta nge nge a. Season kal mekah EPL-a inkhel hmuhnawm ber ang hiala chhal ngam chu 3-3 in a tawp zui ta a ni.
Everton lakah an chak zawh loh vangin City tan champion a harsa sawt dawn a. Champion leh champion loh chu an kuta inghat ni lovin Arsenal kuta innghat a ni tawh. Khelh hmabak pathum an neihah Arsenal an chak vek a nih chuan City in an khingpuite sawp hrep zel pawh nise an champion thei tawh dawn chuang lo. City hian European competition khelh phak tum Brentford, AFC Bournemouth leh Aston Villa te an hmachhawn zui a ngai dawn.
Inkhel dangah Chelsea an khel chhe zawnah an mualah ngei Nottingham Forrest hneh lovin an tlawm.