Pastor pathum kaphlum

May ni 13 khan Manipur-ah Zo hnahthlak Pastor pathum kahhlum an ni a, pawikhawihtute hi chiang faka hriat a la ni lo.
Churachanpur atanga Kangpokpi pana an haw kawngah Thadou Baptist Association India (TBAI) hruaitute chu Kangpokpi district an thlen hnu, Kotzim leh Kotlen khaw inkarah ralthuam lek pawlte’n an lo lambun a, thu dawn danin Pastor pathum- Rev Dr Vumthang Sitlhou (TBAI president), Rev Kaigoulun Lhouvum (TBAI secretary) leh Rev Paogoulen Sitlhou te an boral a, mi dang paliin hliam an tuar a ni.
Thadou Baptist Association India hruaitute hi Kangpokpi atangin Churachandpur-ah Manipur Baptist Convention-ah an tel a, chuta tanga an haw lam chuan vanduaina an tawk ta a ni.
Thil thlen hun tak hi hriat a ni lo a, mipui lam chuan chawhma lam dar 10.30 velah an hria tih thu dawn a ni. Pawikhawihtute hi hriat a ni rih lo.
He thil thleng chungchangah hian MNF Gen. Hqrs. chuan thuchhuah siamin, pawi a tih thu leh thite hi a sun a, pawikhawihtuten an phu ang ngei hremna hmu se an duh tih a sawi.
‘Hetiang thil duhawm lo tak a thleng hi MNF chuan pawi kan ti a. Hliam tuarte tha chhuak leh ngei turin duhsakna kan hlan. Hetianga Pathian mi, sakhaw puithiamte chungah kutthlak a ni hi kan hrethiam lo hle a. Manipur-ah Zohnahthlakte inkarah leh hnam hrang hrang inkarah remna tluantling awm se, tih hi MNF duh dan a ni,’ a ti.