‘Mission Urban Drain’

Aizawl khawpui hriselna, thianghlimna leh himna tura tuiluankawr mumal zawk siamna tur UD&PA hmalakna thar ‘Mission Urban Drain’ chu nimin khan UD&PA minister Pu K. Sapdanga’n a tlangzarh a. Mission Urban Drain hi kum 2033-a zawhfel tura ruahman niin khawpui chhunga tuiluankawr zawng zawng mumal taka kawrpuia luan luhtir vek tum a ni. SASCI hnuaiah cheng vaibelchhe 61.76 hmangin hmun 26-ah tui luan kawr siam hna thawh mek a ni a, cheng vaibelchhe 35 dang dilna tur DPR buatsaih mek a ni bawk.
Tuiluankawr a mumal loh avanga fur ruahtui tam laia Aizawl khawpuiin chhiatna a tawh nasat tawh dan hi tu te pawhin kan hmuin kan hre vek a. Fur laia chhiatna a thlen apianga sawi rik hlawh vat zinga pakhat chu, ‘tuiluankawr a mumal lo em alawm’ tih hi a ni deuh zel.
Chhiatna thlen chhana kan mawhpuh ber chu ‘tuiluankawr mumal lo’ tih a ni chung hian, tuiluankawr mumal tak hi kan siam hlei thei lo chu a ni ber a. Ruah a sur a, lei a min a, silpaulin-in kan khuh a, leimin hlauhawmna deuhvah silpaulin kan zar leh mai a. Fur lai hi chuan Aizawl khawpui hi ralkhat atangin han thlir ila, silpaulin rawng chi hrang hrang hi a inzar zawm pet put mai thin a nih hi!
Tunah hian UD&PA chuan ‘Mission Urban Drain’ an kalpui mek a ni a, kum sarih chhungin Aizawl hian tuiluankawr tha tak leh mumal zawk a nei hman dawn em tih chu kan thlir mek a lo ni leh ta! Eng tak ang leh ang maw?
Kan hriat angin SIPMIU hmalaknain Aizawl khawpui Veng thenkhat (Chhuah lam) ten an hman theih turin Sewage Treatment Plant kha 2009-2019 chhunga thawh a ni a. Khawpui chhung kawngpui hnuaiah pipe lian tak kaltir niin, chu chu chhungkaw tin ten tuichhia leh bal thli an luan chhuahtirna tur a ni. Bethlehem Vengthlang, Chite lui kamah 10 MLD Sewage Treatment Plant din a ni a, ni khatah tui bawlhhlawh liter 1,00,00,000 filter thei tura duan a ni. Hei pawh hi a thawm a ropui ang huin chhuahlama awm chhung tin ban phakin a awm leh ta chiah lo nia hriat a ni.
Aizawl khawpui hi planned city a nih loh avangin tuiluankawr kalna tur hi rem leh rem loa zawn chawp a, phuahchawp deuh ngai tur chi a nih hmel a; hmun thenkhatah chuan leilunga innghat lovin boruaka a kanga kaltir a ngaihna tur hmun te pawh a awm thluahin a rinawm a, khawtlang mipuite nen tangruala thawhhona tha tak neih a pawimawh hmel viau a ni.
Tuiluankawr kan neihchhunte pawh hi, bawlhhlawhin a hnawh nasat thin avangin, furpui-ah chhiatna thlentu a nih leh palh hlauh loh nan, khawtlangin a thenfai hnatlang neih a, uluk zawka kan vil zui a pawimawh leh hle dawn niin a lang.