Sawhthing demand awm laia supply theia inbuatsaih a ngai – Dr KC Lalmalsawmzauva

Mizoramah sawhthing chawh leh a lin a inrual a, demand awm hun April chawhnu lam a nih miau avangin demand awm laia supply thei tura inbuatsaih a ngai tih adviser to chief minister (Handholding) Dr KC Lalmalsawmzauva chuan a sawi.
Mizoram Agriculture Marketing Board co-chairman ni bawk Dr KC Lalmalsawmzauva hian Thawhlehni khan Tuirial Secondary Collection Centre atangin sawhthing hralh tur a vailiam a. Nikum leh kumina an experience atangin sawhthing demand awm tak tak hun chu April thla chawhnu lam a ni a. phai khaw lum lam thar a zawh tan chhoh vang a ni tih a sawi.
“Kumina kan harsatna ber chu a rate awm har lutuk leh sawrkarin kan la har deuh anga lang bakah a rate a tirah kan tuk sang lutuk kha a ni. Chuvangin, a chawh leh a lin a inrual a, farmer-te calendar a buai. Mah se, demand awm hun hi April chawhnu lam a ni miau si a, demand awm laia supply thei tura inbuatsaih a ngai,” a ti.
Farmer-te leh MAMB lamin tih tur an nei ve ve tih a sawi a. Sawrkarin warehouse lian, sawhthing tam tak leng tur an lo buaipui anga, a tam thei ang processing lam an lo buaipui bawk anga, farmer lamin mahni huanah a dahthatna – lei laih khuara chawh sa dahthat lam an tum ve thung ang, tiin, hetiang ‘low cost technology’ hi khawvel hmundangah pawh an uar hle,” a ti.
Sawhthing avangin ram chhung leh pawnah Mizoram-in hriat a hlawh ve ta. Cachar, Bagha leh Siliguri vela tawp thin kha Mumbai, Delhi, Punjab, Kolkata, Odhisa, Andra Pradesh leh foreign a thleng ve ta tih adviser to CM hian a sawi a. Sawhthing market an kalpui mekah mawlmang taka thil kalpui an tum loa, research based-a kalpui an nih avangin tum mumal tak nen year-wise target neiin hma an la tih a sawi bawk.
Hmun ngheta chin leh organic uar zawka kalpui tumin hma an la tan mek a, chemical fertilizer hmang lote sawhthing chauh sawrkarin a buaipui hun a la thleng dawn tih a sawi. “Mihring hi ei leh inah kan duhtui tawlh tawlh a; chuvangin, tun atangin chemical hmang lo ila, 2028-ah chuan organic state-a puan hman kan duh a ni. Organic-a kan kalpui dawn chuan hmun nghetah kan luhpui a ngai a, a soil test pawh kumtin kalpui a ngai dawn a. A hautak deuh na in, ram pawn atanga kan sawhthing an duh chhan ber chu chemical kan hmang tlem hi a ni,” a ti.