Ovarian cancer symptom hmasa a ni thei!

Ovarian cancer hi ‘silent killer’ an ti thin a, a natna lanchhuah dan a awm loh vang ni lovin, a lanchhuah dan hi ngaihthah a awl em vang zawk a ni. Thil ei zawha pum puar, kawng khamna, chau ngawih ngawih, emaw thil tlemte ei pawha puar hma em em te hi a mal mal chuan hlauhawm lo angin a lang thei. Hmeichhe tam takin stress, pum nuam lo, hormone danglam, emaw taksa hah vangah emaw te an puh tthin. Chu tak chu ovarian cancer hi hmuhchhuah tlaina chhan a ni fo thin.
Indian Council of Medical Research (ICMR) tarlan danin, India rama hmeichhia ten cancer an neih tam ber zingah ovarian cancer hi a tel a, hriatchhuah har a ni thin hi he natna enkawlna kawngah harsatna lian ber pakhat a la ni reng. Doctor-te chuan taksa hian hma takah dik lo awm te min hriattir thin an ti a, mahse, chung symptom te chu kan ngaihthah a, kan hrethiam lo thin bawk si a ni.
Hmeichhe tam takin pum puar emaw kawng kham na emaw hi an nei ve fo, chutiang zawng zawng chu ovarian cancer a ni vek tihna erawh a ni lo. Ovarian cancer lanchuah dan chu a danglam deuh hlek a, symptom chu a awm reng a, nitin deuhthaw a lo lang a, a nat dan pawh a satliah lo deuh thin a, nidanga kawng kham na leh pum puar nuam lo ama tawka reh ve leh mai thin nen a inang lo deuh thin.
Dr. Kanika Batra Modi chuan, “Hmeichhe tam takin pum puar ûl reng te, kawng kham na te, emaw thil tlemte ei pawha puar nghal te hi pum lama harsatna pangngai emaw thla tin natnaah emaw an ngai liam mai thin. Mahse, heng natna te hi thil thar, pangngai lo, leh kar eng emaw zat chhung nitin deuhthaw a awm a nih chuan ngaihthah loh tur a ni. Ovarian Cancer hriat hma theihna tura symptom a ni thei a ni,” a ti.
Hei hi ovarian cancer a danglamna lai tak a ni a, natna thenkhat chu hai theih miah loin a rawn lang thut a, ovarian cancer hi chu a symptom hmangin zawi zawiin riat loh karin a lo nasa telh telh thei. Hmeichhe thenkhat chuan thau belh si lovin an kekawr kawng an tawt thut thei. |henkhat chu thil tlemte ei pawha an pum a puar nghal zel avangin chaw ei loh mai mai te pawh an chin phah thei. A dang leh chuan kawng kham na chu an neih chu ngaiah neiin na chhawkna an ei reng thei bawk. A lanchhuah dan hi ngaihthah awl tawk vel leka nasa lo te a ni fo a, chutihrualin ngaihthah mai theih loh turin a reh mai lo ve thin a ni thung.
Eng vangin nge ovarian cancer hi tlai taka hmuhchhuah a nih fo?
A natna lanchhuah dan hi pum lam harsatna, zun kawng, emaw thla tin hunbi lam natna pangngai nen a inang a, chu chuan doctor rawn a tikhawtlai thin. US National Cancer Institute chuan ovarian cancer chu a tirah pum puar, dul na, thil ei harsatna, emaw zun chhuak reng te a awm thei a, mahse heng symptom te hi thil serious lo zawkah kan ngai fo niin an tarlang.
Dr. Modi chuan, “India rama harsatna lian tak chu a natna kan hmuhchhuak tlai thin hi a ni a, a chhan chu hmeichhiain natna doctor pan hma an hreh vang a ni. Heng natna te hi thil satliah emaw, natna serious-lo zawk nena inzawm a nih fo laiin, mahni taksa hriatchian a, danglamna awm reng ngaihven a, doctor pan hreh loh hian ovarian cancer ang chi natna serious zawk te chu a nasat hmaa hmuhchhuah nan a pawimawh a ni,” a ti.
Doctor-te chuan heng symptom zawng zawng hi cancer a ni nghal tihna a ni lo an ti a, mahse, hetiang symptom hi a reh mai loh a, a awm reng chuan ngaihthah loh tur a ni.
Ovarian cancer nena inzawm thei symptom te chu:Pum puar reng, Dul emaw pum emaw na, Thil tlemte ei pawha puar nghal zung zung, Zun chhuak zing, Kawng kham na reh thei lo, Chawlh pawha reh thei lo chau ngawih ngawih, Ek khal ngai mang lo rawn khal thut, A chhan hriat tur awm si lo a rihna tlahniam.
A pawimawh ber chu symptom a awm rei chhung leh a awm zin dan a ni. Heng natna te hi kar hnih-kar thum aia rei nitin deuhthaw a lan chuan doctor entir a pawimawh.