Mizoramah sawrkar damdawi in thaa thlan 60 zingah Sub Centre

India rama sawrkar damdawi in tha bik tehna, National Quality Assurance Standards (NQAS) ah Mizoram atangin sawrkar damdawi in 60 an lang tawh a, heng zingah sub centre level-a a hmasa ber ni turin Tlangnuam Health & Wellness Centre a tel.
National Health Mission Mizoram mission director Dr R Lalchhuanawma sawi danin, NQAS national level endiknaa tling thar Tlangnuam HWC hian a tehnaah 98.03% a hmu. Tunah hian sawrkar damdawi in 11 leh HWC/ Sub-Centre 45-in state level NQAS certificate nei tawhin national level-a endik an dil mek.
NQAS certified damdawi in hi endikna chhawng thum paltlang an ni a, a tawp bera endikna an hmachhawn hi National External Assessment a ni. State pawn atangin assessor (endiktu) an lokal thin a. Hetah hian a tehnaa 70% an hmuh tlin chuan certified an ni chauh thin.
Certified tawh damdawi inah hian natna darh thei ven kawngah, thawktu zawng zawngin an hna bil an thiamna, an level zelah enkawlna an pek that dan, a thlawna enkawlna leh damdawi pek, damdawi in faina leh dik taka damdawi in bawlhhlawh sawngbawl, hawihawmna leh a chhehvel vawnfai kawngah, environment vawnthat kawngah, khawtlang nena an thawhhonaah endik an ni.
NHM mission director chuan he dinhmun an thlen theihna tura thawktu leh tha thawhtu zawng zawng chungah an lawm tih a sawi a ni.