MNF Thalai-in an president dik lo taka titu hmachhawn zel tum

MNF Thalai chuan an president, Robert Romawia Royte chu ZPM-in tihchhiat vek tumin an bei niin an sawi a. Tun atang chuan an president emaw MNF hruaitu dang emaw dik lo taka beitute chu an hmachhawn zel tawh dawn tih an sawi.
MNF Thalai Hqrs hruaitute Nilainia inhmukhawm chuan resolution an siam a. An president Pu Robert Romawia Royte, MLA chu sawrkar kalphung hria, thudik tan thintu leh mi huaisen a ni, tiin, ‘Assembly House-ah leh House pawn lamah pawh huaisen takin thudik a sawichhuah thin avangin ZPM party leh sawrkar hotute hian tihchhiat vek tumin an bei nasa hle a. Tun atang chuan MNF Thalai chuan kan president dik lo taka titu an awm leh a nih chuan kan hmachhawn zel anga, MNF-a kan hotu dangte dik lo taka bei an awm pawhin kan hmachhawn zat zat tawh dawn,’ a ti.
Mizoram sawrkar kaihruai mektuten dawt chi hrang hrang sawia anmahni insawimawi chawp leh dawta sawrkar hmasate beih an ching zual zel niin MNF Thalai hian an sawi a. Hei hi tha lo an tiin, nasa zawka dawt do kalpui nise an tih thu a sawi bawk.
Kum liamtaah Mizoram SASCI sum nuai 43952 a lapse tih Finance ministry Department of Expenditure-in RTI a chhanna hmangin a tichiang tih sawiin, chief minister Pu Lalduhoma’n sawrkar sum tha taka enkawl aiin midang beih a tuipui a, ram leh hnamin a tuar zel thung tih a sawi. Finance minister nihna chu a tlin loh em avangin midang kuta pe turin an phut tih a sawi a ni.
“Kum hnih leh a chanve hnuah pawh ZPM sawrkar chuan MNF hnathawh sa bak project tih tham hawn tur an la nei loa, MNF sawrkar hnathawh phur taka an hawng thin erawh fakawm kan ti hle,’ MNF Thalai resolution chuan a ti.