India leh Italy ramten thawhhona tur tam tak siam thar

India leh Italy chuan an inlaichinna chu tichangtlung turin hma lak zel an tum a, Prime Minister Narendra Modi-a leh a Italian Prime Minister Giorgia Meloni-i chuan buaina leh ram inkungkaihna nghet lo tak tak kara thawhhona tihchakna turin an inkawm a, kum 2029-ah chuan an inkara sumdawnna chu € tluklehdingawn 20 tlintir an tum.
Hruaitu pahnihte hian Ukraine leh Asia khawthlanga buaina chhuak leh khawvela nghawng a neihte an ngaihven thu an sawi dun a, remna a awm theih nan inbengdaia palai intirh a tul thu an sawi a. Strait of Hormuz-a zalen taka lawng a kal leh theihna turin an ngen bawk.
Modi-a hian Thawhlehni khan Rome a thleng a, India-a energy kham neihna tur leh ram venhimna leh himna, sumdawnna leh investment, technology chhuak thar leh leilung hausakna pawimawh bik hrang hranga thawhhona tihchak tuma ram panga a tlawh tura a hnuhnung ber a ni.
Modi-a leh Meloni-i hi Thawhlehni leh Nilaini khan an inbia a, kumin kumtawpa India-European Union (EU) free trade agreement ziah tur chu hmang tangkai turin an inrem.
“Kan inlaichinna hi special strategic partnership hmanga kan tichangtlung hi ka lawm hle a ni,” tiin Modi-a chuan an pahniha thuthar lakhawmtute an kawmnaah a sawi a. “Kum 2025-29 atana India-Italy joint strategic action plan hian kan thawhhona atana hmantlak leh hma lam hun tur ruahmanna a siam a, a hun takah hma kan sawn zel a ni,” a ti.
Hruaitu pahnihte hian an ram inkara sumdawnnaa sum che chu tuna € tluklehdingawn 14 atangin kum 2029-a € tluklehdingawn 20-a tihpun chu an ngai pawimawh dun hle tih an sawi.
Meloni-i chuan Italy leh India-in Indo-Pacific-a zalen taka lawng kal theihna tura hmalak a pawimawh thu a sawi a, chubakah he bial hi India-Middle East-Europe Economic Corridor (IMEC) hmanga Mediterranean tuipui nena inzawmtir a pawimawh thu a sawi bawk.
Modi-a chuan Ukraine leh Asia khawthlanga buaina leh buaina dangte chungchangah India leh Italy chu an inbiak reng thu a sawi a, “India dinhmun a chiang hle – buaina zawng zawng hi inbiakna leh palai intiarh hmanga chin fel a ngai a ni,” a ti.
Meloni-i pawhin Ukraine-ah remna a awm a tul thu a sawi a, Iran buaina chin felna tur leh thutlukna tha siam tura remna zawnga inbiakna neih chhunzawm zel a beisei thu a sawi bawk.
Ram pahnihte hian kum 2025-29 atana joint strategic action plan thlirletna tur leh special strategic partnership atana kal dan tur siam an remti a, hei hi foreign minister-te kaihhruaina hnuaia mi tur a ni a. Modi-a leh Meloni-i hian sumdawnna leh investment, ram venhimna, science leh technology, thil thar chinna, space, energy, AI, zirna leh mi chengte inpawhna lama thawhhona tihpun an remti bawk niin external affairs ministry chuan a sawi.
Modi-a chuan, “Technology leh thil thar chinna hi kan thawhdunna khawlpui a ni a, AI, quantum, space leh civil nuclear energy-ah te thawhhona tha tak a awm a ni,” a ti.