MNF sawrkar bul tan tawh playground ho hawng zel – MNF
MNF sawrkarin bul a lo tan leh hma a lak tawhna playground hrang hrang chu hawn a nih mek bakah hawn tur pawh a la awm nual tih MNF party chuan sawiin, chhuanawm an tih thu an sawi.
MNF Gen. Hqrs. thuchhuak chuan, MNF ministry-in Hlimen Playground changtlung leh rotling, harsatna hrang hrang karah playground tha an neih theihna tura theihtawp a chhuah luihna azarah May 21-a hawn theih a ni ta chu lawmawm a ti a. Hlimen khawtlang leh a chhehvela mipui, a bikin thalai infiammiten an chhawr tangkai ngei theihnan leh Mizote hming chhertu tur thalai tam tak chherchhuahna hmun a nih theihnan duhsakna a hlan tih a sawi.
Hlimen Playground hi Aizawl Smart City Ltd hnuaihbul tan, MNF sawrkar hunah deputy chief minister Pu Tawnluia’n 2023 March 23-a a lungphum a phum, playground siamna tur agreement hi 2021 December-a siam, kum 2022-a hna thawh tan a ni tih a sawi a. Hetihlaia bialtu MLA Prof. F Lalnunmawia theihtawp chhuahna, Hlimen Games & Sports Association leh khawtlang hruaitute theihtawp chhuahna infawkkhawm leh UD&PA minister hlui Pu Tawnluia hmalakna leh tumruhna zarah Hlimen leh a chhehvela chengten an awh em em playground chhenfakawm tak puitlin a ni chu a lawmawm tih a sawi a ni.
Hlimen playground project cost cheng vbch. 6.81, final project cost Rs. 10,65,23,890 (sawrkar laipui Smart Cities Mission atanga hmuh Rs. 9,58,71,501 leh Mizoram sawrkar tum ve Rs. 1,06,52,389) a nih thu a sawi bawk.
‘Hlimen Playground bakah hian MNF sawrkar huna bul tan leh thawh mek hawn theih tur a la awm nual a. Mizorama football stadium tha ber Durtlang Football Stadium, international standard cheng vbch. 22.3 hu chu kumin March 17 khan hawn a lo ni tawh a. Hawn hmabak Mizo High School Field Playground (Multipurpose Ground at High Field Zarkawt) leh thawh mek Zemabawk Playground leh playground hrang hrang a la awm,’ a ti.
Mizo thalai infiammite tana sawrkar hmasa MNF ministry hnathawh leh hmalakna chu MNF chuan chhuanawm a tiin, heng playground leh stadium ropui tak tak hi ram mipui leh thalai infiammiten an chhawr tangkai kim theih hun a nghakhlel hle tih a sawi a. Project kal mekte pawh tha taka thawh zawh thuai a nih theihnan state sawrkar lai chu theihtawp chhuaha thawk chhunzawm turin a chah nghal tih MNF thuchhuah hian a sawi a ni.