Jail tang chhuakte mamawh hnathawh tur: – Chief minister

Zirchianna atangin jail tang chhuakte mamawh ber nia lang chu eizawnna atana hnathawh tur a ni tih chief minister Lalduhoma chuan a sawi.
Synod Prison Ministry chuan Armed Veng Presbyterian Kohhran Hall-ah jail-a táng thin, chhuak tawhte pualin Inrinni khan intawhkhawm a buatsaih a. Hmanpuitu chief minister chuan, Synod Prison Ministry-in Mizorama jail 10-a tangte a zirchianna atangin Mizoramin a mamawh chu chhungkaw din thar a ni a, hemi tur hian ngaihtuahna sen nasat a tul tih a sawi.
Zirchianna atangin, jail tang chhuakten an mamawh nia lang chu hnathawh tur a ni tih a sawi a. Sawrkarin Hulhliap Short Stay Centre atanga chhuakte tan thiamthil zirna a buatsaih thu leh tunah hian Synod kutah Jordan Centre Sethawn chu hlan niin, hetah hian thiamthil zirna pawh kalpui a nih tur thu a sawi bawk.
“A tam thei ang bera chhungkua inkawmkhawm a, harsatna leh vei zawng inhrilh tawnna hun buatsaih tam turin chhungkaw tin ka ngen a. ‘Kristian chhungkua’ tih hi enge a nih a, eng atanga teh tur nge tih ngaihtuah nawn a tul hle,” a ti.
Jail tang chhuakte puala hun hmanagh hian jail tang thin, chhuak tawhten an vei zawng leh inpuanna tur an neihte an inhrilh tawn a, kutthemthiam thil an siam chi hrang hrang phochhuah a ni bawk.