China-a lungalhthei khur puakah mi 82 thi

China hmarchhaka lungalhthei laihchhuahna khur puak vangin mi 82 an thi a, mi pahnih chin hriat lohin mi pahnih an awm tih thuneituten an sawi.
Chhanchhuah hna thawktu hotute chuan Inrinni zan tlai tawh takah khan a tirah thi zat mi 90 vel tih chu siam thain a aia tlem an puang a ni.
Shanxi province-a Liushenyu Coal Mine-a boruakalhthei puak hi kum 2009 hnua China-a lungalhthei laihchhuahna hmuna chhiatna rapthlak ber a ni.
Zirtawpni zan dar 07:29 (India-a tlai dar 04:59)-a a puah lai hian thawktu 247 an awm nia sawi a ni a, mi 100 chuang chhanchhuah an nih thu an sawi a, chhanchhuaktu tam tak chu he hmunah hian tirh an ni.
Chinese President Xi Jinping-a chuan hliam tuarte enkawl leh dam chhuak zawn kawngah theihna zawng zawng hman a ngai tih a sawi.
A hnuah an ram state council chuan chhui chianna khauh tak neih a nih tur thu leh mawhphurtu nia hriatte chu hremna na tak pek an nih tur thu a sawi.
Thuneitute chuan thi zat puan dik loh avangin ngaihdam an dil a, a tirah an buai deuh nuai avangin mihring awm zat chiang lo a awm phah niin an sawi.
Damdawi inah mi 128 enkawl mek an nih thu an sawi a, an zinga pahnih chu an dinhmun a tha vak lo.
A tam zawk chu boruak him lo an hip nasat vanga na niin sorkar chanchinbute chuan an sawi a, eng boruak chi nge a nih tih erawh hriat a la ni lo.
Pathianni zing khan chhanchhuaktute chuan lei hnuaiah mine inspection robot an dah lut a, gas sensor leh infrared camera hmanga thuam niin sorkar chanchinbute chuan an tar lang.
Robot-te hi chhanchhuah hna thawktuten khalhin an thlen theih lohna hmunah lutin data an la khawm a, dam an la awm leh awm loh pawh an hre thei.
Tual chhung thuneitute chuan Shanxi province huam chhunga lungalhthei khurte himna endik nghal turin thupek an chhuah bawk a. Liushenyu Coal Mine enkawltu pawlin khur pali an enkawl zawng zawngah hna thawh tihtawp a nih thu sorkar chanchinbute chuan an tar lang.
Khura management team thenkhat chu hren nia sawi a ni a. Boruakalhthei puak hi hriat a la ni lo va; mahse, sorkar chanchinbute chuan khur chhungah hian hip palha hlauhawm tak, rim nei lo, carbon monoxide chu ‘a awm tur zat aia tam’ a awm niin an tar lang.
Chinese Ministry of Emergency Management chuan chhanchhuah leh thil dang buaipui hna thawktu hian mi 345 a tir a ni.
Sorkar chanchinbute chuan chhanchhuah hna thawhnaah hian chhiatna a puakna bulah tui a tam hle a, hmun thenkhat chu luh theih a ni lo va. Hetih lai hian khurin a chhung awm dan (blueprint) an pekte pawh a taka a awm dan nen a inmil lo niin an sawi.
Kum 2024 khan Liushenyu mine hi Chinese National Mine Safety Administration chuan ‘severe safety hazards’ zingah a dah a ni.
A enkawltu, Tongzhou Group hian kum 2025 chhung khan himna chungchangah thuneitute hremna vawi hnih an dawng tawh nia sawi a ni.
Shanxi province-ah hian China-in lungalhthei a siam chhuah hmun lia thena hmun khat aia tam siam chhuah a ni.