Hmarchhak state hoah sangha tharchhuah tih pun tum dawn

Sawrkar laipui Ministry of Fisheries, Animal Husbandry and Dairying-a Department of Fisheries chuan Thawhtanni khan Aizawlah ‘Regional Review Meeting: Northeastern Region 2026’ a buatsaih.
Hnathawh thlirleta thutkhawm hi a Union minister of Fisheries, Animal Husbandry & Dairying leh Panchayati Raj Rajiv Ranjan Singh chuan hmanpuiin, Union minister of state for Fisheries, Animal Husbandry & Dairying leh Minority Affairs George Kurian bakah Mizoram, Assam, Arunachal Pradesh, Meghalaya, Manipur, Tripura, Sikkim leh Nagaland-a Fisheries emaw Animal Husbandry emaw changtu minister theuhten an chhim a, a then a hmunah telin thenkhat inbiak hmuh theihna hmanga chhim an awm bawk.
Union minister hian India rama Integrated Aquapark hmasa ber Ziro Arunachal Pradesh-a hawnnaa a tel thei chu lawmawm a tih thu sawiin, Integrated Aquapark dang 11 din tura ruahman zinga 4 chu hmarchhak biala din a ni dawn tih a sawi a. Mizoram pawh hetiang hmun dinna atan detail project report leh a hmun tur (land site) siam turin a sawm. Sawrkar laipuiin Mizoram sawrkarin Fish Marketing Center cheng vaibelchhe 50 senga din tura ngenna a thehluh chu an pawm tih a puang bawk.
Sangha khawi, ran vulh leh bawnghnute thar chhuah kawngah hmarchhak state-te chu mahni khamkhawp thar theiin ruahmanna an siam tih a sawi a. State minister-te leh official-te chu sawrkar laipui nen thawkho a, scheme hrang hrang kalpui dan endik a, tih dan tha ber ber hmanga hma la a, a hun taka tihpuitlin a nih theihnan hma la turin a chah a ni.
Thutkhawma sawrkar laipuia joint secretary (Fisheries) Sagar Mehra sawi danin, PM Modi kaihhruaina hnuaiah Blue Revolution, Fisheries and Aquaculture Infrastructure Development Fund, PM-Matsya Sampada Yojana(PM-MSY) leh hmalakna dang tam tak a awm a. Heng hmalakna avang hian hmarchhak biala sangha thar chhuah chu kum 2014-a tonne nuai 3.78 ni kha kum 2025-ah chuan tonne nuai 7.05-ah a kai tawh.
Hei bakah hian kum 12 (2014- 2025) chhung khan sawrkar laipui chuan sangha thar chhuah tam a nih theihnan hmarchhak state tan cheng vaibelchhe 2228 a lo pe tawh tih a sawi a. Assam tan vbch. 614.11, Arunachal Pradesh vbch. 246.03, Manipur vbch. 236.41, Meghalaya vbch. 240.32, Mizoram vbch 246.79, Nagaland vbch. 209.49, Sikkim vbch. 109.41, Tripura vbch. 322.23 a ni.