June thla tirah INDIA-a telte thutkhawm tum – Mamata

West Bengal chief minister hlui, Mamata Banerjee-i chuan eptu party tangrual, INDIA member-te chu June thla chawlhkar hmasa berah an inhmuhkhawm a rinawm thu a sawi a, tanho theih dan tur chungchang sawiho a nih a rinawm thu a sawi a, eptute hi hun rei tak daih tur politic-a indona atan an inpeih tih a sawi bawk.
Banerjee-i chuan Facebook Live-ah, “Inbei turin kan inpeih tawh a, a tawp thlengin kan beidawng lo vang,” a ti.
Platform hmang hian BJP beih tharna a nei a, Trinamool Congress (TMC) supremo hian inthlanah nasa taka thil tihchingpen a nih thu a sawi a, an party-in mipui rilru an hminna chu assembly bial 150 velah dik lo takah dansak a nih thu a sawi.
“Bial chak zawkna chu hlohvah an chantir a, hloh zawk chu chaknaah an chantir a ni,” tiin a puh a, hetiang hi ni lo sela chuan TMC-in bial 220 leh 230 inkar an la thei dawn niin a sawi.
He puhna hi BJP hruaitu hlun, Keya Ghosh-a chuan hnawlin Banerjee-i chu inthlan thutlukna pawm duh lo leh inhnialna siam thei thil hmanga a tlawmna sawi fiah tumah a puh let.
Ghosh-a chuan kum 2011, 2016 leh 2021 inthlanah hneh an chan pawm sia engvangin nge TMC hotu hian tuna inthlan kalpui dan chungchangah rinhlelhna a neih chhan a zawt bawk.
Ghosh-a chuan, “Hneha awm a hmachhawn thei lo va, pawm turin a inpeih lo. Kum 2011, 2016 leh 2021 inthlan kha a dik a nih chuan engvangin nge tunah hian zawhna a siam? Heng inhnial theihna a siam hian danpui a ngaihthah,” a ti.
TMC chairperson chuan voter roll leh inthlan kalphungah thil dik lo a awm nia sawi chu a sawi nawn leh a, inthlan kalpui dan tihchhiat a nih thu a sawi.
“A tirah (SIR hmangin) hming nuai 60 vel paih a ni a. A hnuah tam tak siam that leh ni mah se, stage hrang hranga thil tih dik loh taktak awmte sawina information kan nei a ni,” a ti.