Healh minister hovin Ebola sawiho, India-ah kai la awm lo

Union Health Minister J P Nadda-a’n India-a hri leng awm thei tur venna atana inbuatsaihna leh invenna kalpui dan a thlirletnaah sorkar chuan tun thlengin ram chhungah Ebola vei an la awm lo tih a sawi.
Sorkar thuchhuah tar lan danin union health ministry-a thuneitu sangte nena an thutkhawmnaah Nadda chuan khawvel puma Ebola chungchanga an ngaihtuahna karah ram inpeih dan a zir chiang a, invenna kawng zawng zawng chu fimkhur taka kalpui zel turin a hriattir.
Minister thupek angin inhmakhuana leh inbuatsaihna kawnga hmalaknate tihchak nan union health secretary hovin a kaihhnawih ministry leh agency hrang hranga thuneitute nen joint review meeting an nei tih thuchhuah chuan a tar lang.
Nadda chuan thuneitute chu ram puma Ebola luh theihna hmun zawng zawng – thlawhna tumhmun, lawng chawlhhmun leh khawmuala ramri kânna hmun chu fimkhur leh nghet taka awm turin thuneitute a hriattir tih tar lan a ni.
Indian Council of Medical Research (ICMR) leh National Center for Disease Control (NCDC) te chu hri kai hnuhma chhui, endik leh thlithlai tul atana ruahmanna zawng zawng inpeih reng turin a hriattir bawk.
World Health Organization (WHO)-in Ebola leng hi Public Health Emergency of International Concern (PHEIC)-a a puan hnuah sorkar laipui chuan fimkhurna a tizual hle a. Africa Centres for Disease Control & Prevention chuan Public Health Emergency of Continental Security (PHECS) atan a puang tawh bawk.
Thuneiutute chuan ram chhunga luh theihna hmunah thlithlai leh agency hrang hrangte uluk taka an thawh thu an sawi a, hei hi hri kai nia rinhlelh a awm chuan a hma thei anga hriatchhuah a nih theih nan leh rang taka chhanchhuah a nih theih nana hmalak a ni.