Congo atanga thleng thar leh mi dang pathum khung hrang
Congo atanga sumdawng pakhat leh amah lo hninhmai deuhtu mi pathum chu Ahmedabad-a damdawi in hrang hranga isolation ward-ah dah an ni a, an sample lakniin Ebola virus test turin thawn a ni tawh tih Gujarat Health Minister Praful Pansheriya-a’n a sawi.
Kum 37 mi, sumdawng hi ni nga atanga ni sarih vel kalta khan Congo atangin Mumbai a thleng a, a hnuah Vadodara-ah a zin leh tih a sawi.
Health minister chuan, “Khawsik a neih hnuah Vadodara-a Banker Hospital-ah dah a ni,” a ti a, tun thlengin hri kai tih finfiah a la ni lo va, hlauhthawn a ngai lo tih a sawi.
Sumdawng hi Ahmedabad Civil Hospital-ah sawn a nih thu sawiin, Ebola ward-ah dah a nih tih a sawi.
A dinhmun pawh a tha a, a khawsik pawh thunun theih a nih thu minister chuan a sawi a, amah lo hnuhmaitu khung hrang mi pathumte pawh hi an taksaah natna lang a awm lo tih a sawi bawk.
“A kalpui mi dang pahnih pawh fimkhur nan Ahmedabad-a SVP Hospital-a isolated ward-ah dah an ni bawk a. Heng mite nena lo inhnihmai deuh mi dang pakhat dah hran a ni bawk,” tiin minister chuan a sawi.
Heng mite hi ni 10/11 chhung dah hran an ni dawn a, an thisen sample pawh Pune-ah endik turin an thawn tawh tih a sawi bawk.
World Health Organization (WHO) chuan Democratic Republic of Congo (DRC) leh Uganda-a Ebola leng mek chu May 17 khan Public Health Emergency of International Concern (PHEIC)-ah a puang.
Africa ram eng emaw zatah hri leng vang hian Gujarat health department chuan Uganda, Congo leh South Sudan atanga thleng passenger-te chu Ahmedabad International Airport-ah intensive screening a nei mek a, sorkar damdawi inah isolation ward a buatsaih bawk.
Pansheriya chuan a hmain mi pakhat dah hran a lo ni tawh tih a sawi a, a hnua hri leng hi a kai lo tih finfiah a ni tih a sawi.
“A hmain tuna mi ang deuhva mi dah hran a lo awm tawh a, endik hnuah hri a kai lo tih finfiah a ni a. Hei vang hian engmah hlauhthawn chhan tur a awm lo,” a ti.
Minister chuan mipuite chu thuthang leng vel ring lo turin a chah a. “Tunah hian India-ah emaw, Gujarat-ah emaw Ebola kai hmuh an la awm lo va. Fimkhur nan heng ram atanga lo thlengte chu uluk takin kan vil a, a bik takin khawsik na vak lo, khawsik nasa deuh emaw, khuh emaw ang chi an neih chuan hri darh theih dan tur venna atan kan vil reng a ni,” a ti.
Hri kai nia rinhlelhawm deuh an hriat chuan health officer emaw, a kaihhnawih damdawi in emaw, Primary Health Centre-ah emaw inhriattira zawh fiah a ngai tih a sawi.