Israel-in Hamas sipai pawl commander thar that lehnghal

Hamas sipai pawl (military wing) commander thar, Mohammed Odeh-a chu a hma ni tam vak lo liam taa a thlak tak thah a nih hnu lawkah Thawhlehni khan Gaza Strip-ah beihpui thlaknaah a thi veleh.
Odeh-a thihna beihna thlengah hian mi tam takin hliam an tuar a, Gaza City-a bazar lun ber zinga mia chenna in pakhat chu kah niin tual chhung damdawi in leh a hmututen an sawi.
Israeli sipaite leh Shin Bet security service chuan a ruka Odeh-a chenna hmun ni thin building-te hi thla eng emaw zat chhung a che vel an zui hnuah beih a nih thu an sawi.
Nilaini khan Hamas pawhin Odeh-a thah a nih thu an nemnghet a, a nupui leh a fate pahnih an thi tel tih an sawi bawk.
October thlaa Israel leh Hamas inkarah inkahhai puan ni mah se Gaza-ah hian ni tin deuhthaw tharum thawhna a la thleng zel tho a ni.
Thawhlehnia beihnaah hian Gaza khawpui lailia al-Kayali building chung lam chhawng thum kah a ni a, a hmun hi dawr tamna hmun niin Muslim-te sakhaw kût pawimawh tak, Eid al-Adha hmang tura inbuatsaiha mi veivak an tam laiin a ni.
Chhanchhuahtu team chu che nghal mah se a hmun a chhiat nasat avang leh mipui an tam lutuk avang an che chak thei lo.
A hmutute chuan building hi kil hrang hrang atangin a indawt zatin missile panga vela kah niin an sawi a. Kah a nih hma lawk hian a chungah helicopter thlawk ri hriat tur a awm bawk niin an sawi.
Video darhah chuan a bul velah hian ambulance leh chhanchhuah hna thawktute awmin building chhia chu an dap a, a bulah mi tam tak an pungkhawm tih a lang.
Israel Defence Forces (IDF) leh Shin Bet-te thuchhuah chuan, “IDF leh Shin Bet ten firfiak Mohammed Odeh tihbo tumin beihpui an thlak a, Gaza khawpui lailia a inthupna hmun ni thin building eng emaw zat chu beih a ni a, thla tam tak chhung chu a chetna leh a puitute chet velna an thlithlai hnuah beih a ni,” an ti.
‘October 7-a beihna thlentu, Odeh-a puitu pawl zinga mi, Hamas firfiak pakhat ta, a bul hnaia apartment’ pawh an kap tih an sawi a. Gaza-a indona thlentu, Hamas kaihhruaiten Israel chhim lam an beih an sawina a ni.
Odeh-a hi official-in Izzedine al-Qassam Brigades hruaitu thar atan puan la ni lo mah se ni eng emaw zat kalta khan thlan a ni tih hriat a ni.
Israeli Prime Minister Benjamin Netanyahu-a pisain Thawhlehnia thuchhuah an siamah chuan Odeh-a hi Gaza-a indona chhuah chhan ber, October 7, 2023-a Hamas-in Israel chhim lam an beihnaa a ruahmantu zinga mi a nih thu a tar lang.
“Israeli-te leh IDF sipai tam tak thah, ruk bo leh hliam tuarnaah hian Odeh-a hi a mawhphurtu a ni,” a ti.
Odeh-a hmaa an pawl armed wing commander, Izz ad-Din al-Haddad-a chu May thla tir lam khan Israel hian a lo that tawh a ni.