Champion tura rinkai Sinner a tla daih

French Open 2026 khelh mekah Ningani khan inlehthalna lian a thleng a, champion tura rinkai ber Jannik Sinner chu Juan Manuel Cerundolo hneh lovin a tla a, second round a paltlang zo lo.
Champion lai leh French Open-a vawi hnih champion zawn tawh Carlos Alacaraz a inlan theih loh vangin French Open 2026-ah World No. 1 Jannik Sinner hi champion tura rinkai ber a ni a. Inelna hrang hranga a khelh hnuhnung vawi 30 zetah a chak zawn tawh vangin champion turin rin a kai leh zual. Roland Garros-ah hian champion se Career Slam a puitlin thei dawn a. Grand Slam pali-a champion kim a tumna chu khaw lum lutukin tuihu ang maiin a zam raltir ta a ni.
2025-ah final-ah uiawm taka champion z ta lo Jannik Sinner hian second round-ah World No. 54 Juan Manuel Cerundolo a hmachhawn. A khingpui lakah hian bul a \an chhe lo viau a, harsa lutuk lovin set hmasa pahnih a la.
Set hmasa pahnih a lak hnuin khaw lum lutukin Sinner a tibuai a, inkhelh laiin enkawl a ngai hial. Chau tak chunga inlan hram hramin set thumnaah chak tlang tumin \an a khawh a, uiawm taka a serve vawi khat a hum zawh loh vangin game nga la bawk mah se set a hloh a, Cerundolo-a’n set a la.
Harsa taka set a lak hnuin Cerundolo a phur zui viau. Khaw lum lutukin Jannik Sinner thahrui a chhat zova, a sakruangah laitha reng a zam tawh lo. Khaw lum lutuk vanga chau leh buai tak Sinner hian a khel thei hlawl lo a ni ber tawh a, set linaah game khat bak a la thei lo.
Chau tak chungin inlan hram hram mah se Sinner a insiam\ha thei tawh lova, deciding set-ah game khat bak a la thei lo leh a, World No. 54 Juan Manuel Cerundolo lakah 6-3 6-2 5-7 1-6 1-6 in a tlawm a, second round paltlang zo lovin a tla a. French Open a champion a beiseina chu a thlawn zo leh ta rih.
Champion tura rinkai ber Jannik Sinner a tla a, Carlos Alacaraz a inlan thei bawk si loh vangin hun rei tak hnuah Sinner leh Alcaraz ni lo midang Grand Slam-ah an champion dawn. Alcaraz leh Sinner ber an awm loh vangin Djokovic chance a \ha ta hle.