Jail tang zingah AMC area ami an tam Fa nei tlem leh unau tlem an tam zawk

Mizorama jail tang dinhmun zirchiannaah Aizawl Municipal huamchhunga cheng an tam hle a, tang zinga nupui pasal nei tawh zingah a tam zawk chu fa nei tlem an ni a, tang zingah unau pianpui ngah aiin nei tlem an tam zawk bawk. Synod Prison Ministry-in Mizoram jail hrang hrang a zirchiannaah Aizawla awm Central Jail, Women Central Jail leh District Jail-a tang belhkhawm bik chauh chu Mizoram jail dang zawng zawng nena belhkhawmin zaa 60.5 a ni pha a, chu’ng zingah chuan Aizawl Municipal pawn lam mi zaa 46.6 an ni thung. Mizoram jail-a tang zawng zawng atanga chhutin zaa 59.8 chu AMC pawn lam mi an ni a, AMC huamchhunga cheng zaa 40.2 a ni pha. Ramri bulhnai jail-ah tang an tam leh deuh bawk.
Heta lang chu, khawpuiah dan leh thupek pawisak lohna a lian hle a tih theih, tiin, “Tang zawng zawng atanga chhutin AMC chhunjg ami hetiang zat an awm thei hi ngaihtuah tham a tling. Mihring bitna hmunah tha lehzuala dan leh thupek kenkawh a nih theihnan tan lak a tul hle,” zirchianna hian a ti a. Nitin zirna in leh Sunday School-ah a tam thei ang inzirtir uluk lehzual tul tih thu sawi a ni.
Jail tang zinga zaa 76.7 chu kum 18-40 inkar an ni tih a sawi a. Thalai huanga khung theih heti zat an ni chu, kan thalaite dinhmun a tha lem loa, kan ram natna vei zingah ngaihven hlawh ber tur ni ah an ngai tih sawi a ni.
Zirchianna atang hian, nupui pasal nei tawh zingah fa nei tam aiin fa nei tlem zingah tang an tam zawk tih sawi a ni a. “Fa nei tamte hian chhungkaw mawhphurhna an la lungrun zawk a tih theih ang,” a ti. Chutihrualin, unau pianpui pali leh a chunglam nei zaa 39.6 an nih lain, unau pianpui nei lo leh pathum thleng nei belhkhawm chu zaa 60.4 an ni thung tih a sawi bawk.
Tang zingah lehkhar zir sang lo an tam zawk tih zirchianna hian a sawi a. Pawl 12 leh a hnuailam thleng zir zaa 91.3 niin, sawrkar hna, mahni hna leh sumdawng zaa 31.5 an ni a; private-a thawk, hna nei lo, nitina inhlawh chawp ang chi belhkhawm chu zaa 68.5 an ni. “Mihring khawsak phung thlenga nghawng thei a nih avangin zirna hi jail chhungah chhunzawm theih nise a tha in a rinawm,” a ti.
Ruihhlo leh zu tawlhruk/ zawrh lama inhnamhnawih vanga jail tang zaa 47.8 an awm a. Thil ru, in rawk vanga tang zaa 25.5 awmin, pawngsual/ mi khuaikhem vanga/ POCSO vanga tang zaa 18 niin, tualthah, ram dan bawhchhiat leh thil dang vanga tang zaa 19.9 an ni. “Ruihhlo do kawngah kohhran leh sawrkar kan thawhho nasat zual a pawimawh,” a ti.
Jail tang zingah Mizoram-a hluar lo, tawlhruknaa a kalkawng ringawt nia ngaih methamphetamine ti ve tawh zaa 8.2 an awm. Zu in thin zaa 83.9, heroin ti thin zaa 42.3, ruihna atana hman thin damdawi mum ti thin zaa 24.2, ganja zu thin zaa 30.6 an awm a; kum tlin hmaa ruihhlo khawih tan zaa 48.8, thiante avanga ruihhlo ti tan zaa 46, jail atanga chhuah hnua la ruihhlo khawih zawm tuym zaa 36.1 an awm a. Ruihhloa sumdawng zaa 55.35 an awm bawk.
Synod Prison Ministry hian kum 2025 khan Mizorama jail hrang hranga tang ho a zirchiang a, zawhna inang chhan tur a pe. Zirchianna neih lai hian tang 1735 an awm a, an vai hian heng zawhna hi pek vek niin, mi 1452 (83.68%) in chhanna an pe let a ni. Tang zingah hnamdang leh Kristian ni lo an awm nual avangin an tana chhan rem lo a awm nia sawi a ni. Prison Ministry rawngbawl zelna atan, kohhran, khawtlang leh sawrkar anga tan lehzual ngaihna tur nia an hriat rawtna an siam a ni.