Beirut daia Hezbollah bei turin Israel PM-in thu pe

Iranian-te thlawp ralthuam keng pawl, Hezbollah nena an buaina a zual zel avangin Israeli prime minister chuan Lebanon khawpui, Beirut chhim lam daia beihpui thlak turin thupek a chhuah.
Benjamin Netanyahu-a chuan Hezbollah kulhpui, Dahieh-a ‘firfiakte’ chu rocket leh drone hmanga Israeli civil mite bituma an beih bakah April thlaa indona tihtawp thei ta chuang lo inkahhai puan bawhchhiatna dangte chhanna atan kah a nih tur thu a sawi.
Prime minister-in thu a puan hnu rei vak lovah hian hmun hima tlanchhiat tumte kawngpuiah an inhnawh tawn nghal hle.
Buaina hi US-in Iran nena an indona tihtawp tura inremna siam a tumna kawngah pawh daltu lian tak a ni a, Tehran chuan inkahhai an kalpui dawn a nih chuan Lebanon pawh huam teltir ngei an duh tih a sawi.
US chuan Lebanon-a thil thleng chu an inbiak meknaa tel loh a tum a; mahse, US thuneitu pakhat chuan Pathianni khan Secretary of State Marco Rubio-a’n Netanyahu leh Lebanese President Joseph Aoun-a te hnenah ‘zawi zawia boruak tihdan’ dan tur rawtna a thlen tih a sawi.
Lebanese sorkar thuneitu sang pakhat chuan US kutah Israel-in dan a bawhchhiatna a tihtawp nan leh civil mi thi zel tur venna a innghat tih a sawi.
Thawhtanni tuka thuchhuah intawm an siamah Israeli prime minister leh Defence Minister Israel Katz chuan Dahieh bei tura thupek an chhuah thu an sawi a, hei hi ‘Hezbollah firfiak pawlin Lebanon-a inkahhai puan a bawhchhiat nawn fo leh a bawhchhiat chhunzawm zel avang leh kan civil mi leh khawpuite an beih vang’ tih an tar lang.
Katz-a chuan, “Beirut-a Dahieh hi Israel hmar lama chengte nen a danglam bik lo – hmar lamah muanna a awm loh chuan Beirut-ah hian muanna a awm bik lo vang,” tiin a sawi a ni.
Thuchhuah a nih hnuah Israeli sipaite chuan Dahieh-a chengte chu anmahni himna atan insawn chhuak turin thupek an pe nia sawi a ni bawk.
Chhungkaw hrang hrangte chu suitcase, blanket leh an thil phurh theih apiang phurin car-in khawpui an chhuahsan hlawm a, tharum thawhna thlen belh zel hlauhna a pun zel avangin tlang lam pana tlanchhia mi sang tam tak chu an zawm.
Israeli sipaite hian April 16-a Israel leh Lebanon inkahhai puan a nih hnuah Beirut hi vawi hnih an bei tawh a, a hnuhnung ber chu Ningani kha a ni.
Lebanon hi March 2 khan indonaah a tel ve tan a, Hezbollah hian Iranian Supreme Leader a thah phuba lakna atan rocket-in Israel an kap a. Israel chuan Lebanon pumah thlawhna hmang leh chhim lamah leia beihpui thlakin a chhang let a ni.
Indona chhuah hnuah Lebanon-ah hian mi 3,433 an thi tawh niin an ram health ministry chuan a tar lang a. Israel chuan sipai 24 leh civil mi pali an thi tawh tih a sawi ve bawk.