Drone-a Russia thunun rama bus beihnaah mi pasarih thi

Russia-in a thunun chin Ukraine-a passenger bus chu drone-a kah fuh niin mi psarih an thi a, mi 11-in hliam an tuar niin thuneituin a sawi.
Ukraine khawchhak Donetsk region-a Kremlin-a dah hruaitu, Denis Pushilin chuan bus hi Russia-in a awp, Crimea-a Moscow leh Simferopol inkara a tlan laiin Nilaini zing khan a kah niin a sawi.
Nilaini vek khan zing lamah St Petersburg khawpui chungah meikhu dum a tam hle bawk a, Ukrainian President Volodymyr Zelensky-a chuan khawpui chhunga tuialhthei hmun an kah fuh thu a sawi.
Beihpui thlakna hi khawpuia kum tina neih thin, International Economic Forum buatsaih lai a ni a, he event hi khawvel hriata Russia pho lanna atana ruahman a ni.
Beihpui thlakna hi Russia-in nasa taka Ukraine khawpui hrang hrang an beih tuka thleng a ni a, Moscow sipaite chetnaah hian mi 22 an thi a, hmeichhia leh naupang eng emaw zat an tel.
Donetsk-a drone-a bus beih chungchangah Pushilin-a chuan, “Yenakiyevo-ah hian UAV hmangin Moscow-Simferopol coach beih a, report hmasaah chuan civil mi pasarih an thi a ni,” a ti.
Hliam tuar mi 11 te hian damdawi lam enkawl mek an ni tih a sawi bawk.
Ukraine hian he thil thleng chungchangah hian engmah a la sawi lo.
Belgorod, Kursk leh chhim lam bial dangte bakah Moscow bulah leh Sea of ​​Azov chungah drone thlawh a ni tih Russian thuneitute chuan an sawi a. A vaiin Russia chuan zan khat chhungin Ukraine drone 350 zet an kap thla niin a sawi.
Drone zinga 50 vel chu Moscow hmarthlanga Leningrad region chungah an tla niin regional governor Alexander Drozdenko chuan a sawi.