Ruihhlo do: CYMA & MKHC

Ruihhlo do kawnga tan ho dan tur chu Central YMA leh Mizoram Kohhran Hruaitute Committee chuan tun hnai khan an sawi ho a. Hmalak dan tur hi chipchiarin mipui lamin hre lo mah ila, ruihhlo do kawngah YMA leh MKHC an thawh dun chuan hmasawnna duhawm tak a thlen ngei a beisei theih awm e.
Ruihhlo do kawnga Central YMA hmalak tawh dan leh hmalak mek dan hi chu mit leh bengin kan hmuin kan hre malh malh ta hle a. Heti khawpa CYMA hmalaknaa ruihhlo do a ni chung pawha tun dinhmuna kan la awm hi, CYMA hian ruihhlo do kawngah hma la ta lo se chuan, kan ram dinhmun tur hi suangtuah ngam pawh a ni awm lo e.
Mizorama ruihhlo hluar dan leh ruihhlo avanga buai Mizo thalaite an tam tawh dan te, chhungkua bakah khawtlangin kawng hrang hranga a tawrh mek dan te pawh chanchinthar lamah ni tin zan tin puanzar a ni a, ruihhlo kaihhnawih buaina hrang hrang chanchinte hi ngaihthlak peih chhung ngaihthlak tur a awm a ni ber tawh awm e.
Ruihhlo do han tih hian, ruihhloa sumdawnna leh ruihhlo ngawlveite a kawk nghal a. Ruihhloa sumdawnna- ramri kaltlanga ruihhlo lo lut tur lo dan te, Mizoram chhunga ruihhlo lo lut tawh chin manchhuah tuma beih te, ruihhlo ngawlvei (drug addict) buaipui te hi ruihhlo dovin a ken a ni tlangpui awm e.
Kan hmuh mek angin, CYMA hian heng zawng zawng hi a hma vek a ni ber a. MKHC lam hian ruihhloa sumdawngte veh kual leh ruihhlo man tur zawn chiam lam hi chu a thawh ve a remchang hran lo ang a, mahse ruihhlo ngawlveite enkawl kawngah leh, ruihhlo ngawl vei maithei naupang leh thalaite kawng dik zawh tura kaihhruai kawngah erawh nasa takin hma an la theiin chu lamah chuan an thawh hlawk thei hlein a rinawm.
Ruihhlo do kawngah hian enge pawimawh ber tih hi sawi fak hleih theih pawh a ni lo a, ruihhlo dona atana hmalakna tawh phawt chu a pawimawh vek awm e. Chuti chung chuan, a pawimawh ber thlan chhuah ngei ngei tur ni ta se, ‘ruihhlo laka la buai lo naupang thanglai leh thalaite kawng dika hruai’ tih hi a pawimawh hle awm e. Tuna ruihhlo ngawlvei mekte bak hi chu ruihhlo avanga buai awm belh tawh miah lo tura hma kan lak theih chuan, demand-tu an awm dawn lo a, supply lam pawh a kiam chho ve mai dawn tihna a ni. He lamah hian MKHC lam hian beihpui an thlak thei ngeiin a rinawm.
Eng pawh ni se, ruihhlo do kawngah hian sawrkar, pawl, kohhran, khawtlang, chhungkua leh mimal kan tanrual a tul takmeuh tawh tih a lang.