Hmun hrang hranga Zofate tan YMA

On Jun 16, 2026 0 0

Young Mizo Association (YMA) a awm a, Zofate tana din a nih ang ngeiin hmun hrang hrangah Zofate tan he pawl hian a thawk thin. Thawhtanni khan a din champha, YMA Day a ni a, hmun hrang hrangah YMA te’n he ni hi an hmang.“YMA chu Zofate tana din a ni a, Mizoram chhung leh Mizoram state pawna Zo hnahthlakte zawng zawngte huaptu pawl a ni a, Zofa tawh phawt chu a huam a, hmun hrang hranga Zo hnahthlakte tan YMA hian theihtawp a chhuah reng a ni,” tiin Central YMA president R Lalngheta chuan The Aizawl Post a hrilh.
Mizoram chhungah hmun hrang hrangah YMA a din thu a sawi a, Manipur, Tripura leh Meghalaya-ah te Group YMA a awm a, Bangladesh-ah Branch a awm thu te, Assam-ah pawh YMA a awm thu te a sawi.
Myanmar-ah chuan sipai sorkar hnuaia an awm avangin YMA hi din theih a ni rih lo tih a sawi a, mahse Myanmar-a Zo hnahthlakte tan pawh YMA-in theihtawp a chhuah \hin tih a sawi.
“Mizoram leh Mizoram pawna Zofa zawng zawng huaptu pawl a nih angin YMA hian hmun hrang hranga Zofate tan theihtawp a chhuah \hin a. Harsatna tawk an awmin YMA-in a theih ang tawkin a pui a, hma an sawn zel a duhpui bawk a,” YMA president chuan a ti.
“Bangladesh, Manipur leh Myanmar-ah kan unaute’n harsatna an tawk mek a, YMA chu an tan a che reng a, Mizorama an rawn raltlan pawhin YMA-in a lo kuah a,” a ti a, “YMA hian Zofate’n harsatna an tawh apiang a hmachhawn \hin a ni ber mai,” a ti bawk.
Ruihhlo vanga harsatna a nasat avangin YMA chuan heti lam hi a hawi a, Ruihhlo Do Kum a puang mek tih a sawi a, “Ruihhlo Do Kum hi a sawt khawp mai a. YMA te’n hmun hrang hrangah ruihhlo an man a, a theih ang angin ruihhlo vanga harsatna tawkte a pui bawk a, ruihhlo vanga harsatna tawkte enkawlna hmunte pawh a pui bawk a,” a ti.
YMA thuvawn chu ‘\anpui ngaite \anpui’ tih a ni a, kawng hrang hranga \anpui ngaite \anpui chu YMA thiltih langsar a ni.
YMA hi hmun hrang hrangah an inzar pharh a, Mizoram chhunga District pakuaah Sub-Headquarters 9 an awm mek a, Group 49 awmin Branch hi 831 a awm a, Mizoram chhungah Branch 774 an awm a, State pawnah Branch 57 a awm bawk. YMA Day-ah hian tlang hrang hranga YMA te’n kawng hrang hrangin mi dangte tana thiltih an nei a, YMA Day hi Zofate’n mi dang tana thiltih an ngah ber ni a ni hial mai thei.