Nuai 26 man organic aieng hralh
Tlabung Turmeric Farmer Producer Company Ltd. Lunglei district chuan aieng tharchhuah cheng nuai 26.6 man Assam lamah an thawnchhuak.Department of Agriculture & Farmers’ Welfare-in Mission Organic Mizoram (MOM) kaltlanga hma a lakna – Mission Organic Value Chain Development for North Eastern Region (MOVCD-NER) hnuaia farmer producer company din – Tlabung Turmeric FPC Ltd. Zodin Tlabung aieng thar, metric ton 25, cheng nuai 26.6 man hu chu Rituparno Tamuliphukan, Guwahati hnenah an hralh a. Thawhlehni khan adviser to chief minister Dr KC Lalmalsawmzauva chuan Ch. Saprawnga Truck Terminal Rangvamual atangin a vailiam.
“Uar deuha sawrkarin kalpui a tum chu ‘organic’ leh ‘pesticide free’ a ni. Kum 2028-ah chuan Mizoram chu ‘organic state’ ni turin chief minister hoin theihtawp chhuah a ni a. Support price thlan turah pawh chemical tel lo, organic chauh a nih hun a la awm thei ang. Farmer-te hriat lawk atan ka sawi a ni,” a ti.
Chemical an hman loh chuan leitha atan ‘bio-fertilizer’ an mamawh nasa dawn a, ‘wood leh bamboo vinegar’ siamthiam pawh in-report turin an duh a. Bana Kaih kaltlanga puihna ngaihtuahsak theih an ni dawn tih a sawi a ni.
“Sawhthing bikah cheng vaibelchhe 22 vel ‘support price’ pek a ni tawh a, siamrem hret ngai a awm avangin engemaw zatin an la dawng lo. Lo dawh hram hram ula, rei vak loah tih fel theih beisei a ni,” adviser to CM hian a ti.
Tlabung FPC hian aieng (organic dried turmeric finger) metric ton 25 chu kg-ah Rs. 106.4 zela hralhin, nuai 26.6 an hmuchhuak a. Sairang atangin ton 5 ‘slice dried’ an vailiam tawh a, tunah a vawikhatna atan aieng ‘finger dried’ an vailiam leh tih a sawi bawk. Tlabung Turmeric FPC Ltd. hnuaiah hian organic aieng chingtu intelkhawm member 500 an awm mek.
MOVCD -NER hi state lead agency – MOM, Department of Agriculture & Farmers’ Welfare hmalakna niin, tunah Phase III zawhfel tawh a ni a, Phase IV kalpui leh mek niin, tun thlengin organic FPC 41 ziah luh an ni tawh a, FPC 41 hnuaiah hian organic farmer 27604 ziahluh an ni tawh.