Tourist site 7-ah vawikhat hman chi plastic ho khap

Urban Development & Poverty Alleviation Department-in Aizawl district-a ‘tourist site atan hmun pasarih a thlanah vawi khat hman chi plastic lam hman khap a nih thu Aizawl district magistrate chuan a puang.
Aizawl district magistrate thuchhuak chuan, UD&PA department-in Aizawl district huamchhunga tourist site-a a puan hmun 7 – Lalsavunga Park, Hlimen; Falkawn Zokhua; Sakawrhmuituai Tlang; Hmuifang Tlang; Khawhpawp Lawipu; Sairang Rel Station leh Sialsuk Tlangah vawi khat hmana paih nghal chi -single use plastic (SUP) hman, hralh, sem leh khawl a khap a. Solid Waste Management Rules 2026 hlawhtling taka kalpui a nih theihnan a paihna tur ni loa bawlhlawh paih tihremna atan leh tul loa plastic hman tihtlem a nih theihnan he thupek hi chhuah a ni tih a sawi.
Heng hmun tlawhtu, a huamchhunga thil zuar, dawr neitute leh he thupekin a nghawng tel dangte chu SUP aiah environment tichhe theilo leh hman nawn theih hmang zawk tawh tura tih an ni a. Nodal officer leh Sanitation officer-ten SUP Enforcement Team kaltlangin he thupek hi zawm a nih ngei theihnan an bawhzui dawn tih a sawi a ni.
Hei hi Supreme Court of India-in kumin May 5-a Solid Waste Management Rules 2026 kalpuinaah tourist site thlang a, bawlhhlawh sawngbawl dan tihhmasawn a nih theihna tura thuchhuah a siam bawhzuina a ni tih sawiin, thupek bawhchhia an awm chuan Solid Waste Management Rules 2026; Plastic Waste Management Rules 2016 leh a kaihhnawih dan hnuaia ngaihtuah theih a ni dawn tih a sawi.