World Blood Donor Day hmang Thisen pe tha ho an chawimawi

Nilaini khan Aizawlah World Blood Donors Day hman a ni a. A thlawna thisen pek lama tithate hnenah chawimawina hlan an ni.
Hmanpuitu Health & Family Welfare minister Lalrinpuii chuan, Mizo nun zemawi tlawmngaihna vawnnun zel a pawimawh a, thisen pek chu tlawmngaih lanchhuahna a ni tih a sawi. Mizoram pawna awm Mizoten midangte nun chhanna atana thisen an pe thin chu a chhuanawm tih sawiin, hmun danga awmten Mizo nun mawi an hriat theihna pawimawh a ni tih a sawi. Mizoramah mimal tlawmngai leh pawl thahnemngaiten thisen an pe thin chu fakawm a tih thu a sawi bawk.
Mi kan pun zel avangin damlo leh thisen mamawh pawh a pung ve zel a, thisen pe thin mi tlawmngai mimal leh pawle an hlu zual tih a sawi a. Mi hrisel tan thisen chu thla thum danah a pek zel theih avangin vawikhat thisen peka duh tawk mai loa, ‘regular blood donor’ nih tum turin a sawm a. Thisen pek tluk zetin thisen thianghlim a pawimawh avangin, mitinin nun uluk tur leh hriselna atana pawi thei ruihhlo leh mipat hmeichhiatna thianghlim lo laka invawng fihlim turin a chah.
World Blood Donors Day hi June 14-a hman thin a ni a, kuminah Pathiannia a tlak avangin Mizoramah chuan district hrang hrangin an remchan dan angin hun dangah an hmang. Nilainia hmannaah hian April 2025 – March 2026 chhunga Aizawl district-a Blood Center pathum – Civil Hospital Aizawl, Synod Hospital Durtlang leh ZMC&H Falkawna thisen pe thate hnenah chawimawina hlan an ni.