World Cup thliin TV len lut

Khawvelah World Cup thli a tleh a, Mizoramah pawh he thli hi a tleh mek. Mizoramah chuan he thli hian TV a len lut.
TV-in radio a lan a, internet-in TV a lan ve leh. Mahse World Cup-in TV a tinung a, Mizoramah TV en an pung leh.
LPS leh Zonet te’n TV pawt thar an pung tih an sawi ve ve a, sub operator-te pawhin tunlai chu betu an ngah. World Cup en nana cable TV pawt thar an pung a, World Cup hi a tir lam a la nih chauh avangin an pung zel tura ngaih pawh a ni.
An sawi danin, World Cup tan hma chawlhkar hnih vel atangin TV pawt hi an pung a, an an hnuah an pung zual; a tir lam ni thum vel phei kha chu pung tak an ni.
Engemaw lai atang khan khawvel hmun dang ang bawkin Mizoramah TV a tlahniam a, mipuiin internet an hman nasat vang a ni. TV set chu a hralh a la kal tho a, mahse youtube enna atana hman a ni tlangpui tawh ang. Chutiang karah chuan World Cup a lo thleng a, TV pawt leh entu an pung leh ta a ni.
LPS leh Zonet tea subscription buaipuitute sawi danin, TV pawt thar han tih hian, set top box nei sa, tinung lova hluihlawn tawh, tinung leh an ni deuh ber a, set top box pawh nei thar chawp chu an tam lo. Amaherawhchu, set top box nei sa lo hi an tam a rinawm loh a, chuvangin TV pawt an pung a nih pawhin set top box lei chawp ngai hi an tam vak tura ngaih a ni lo.
TV sub operator pakhat chuan TV pawt thar duh an pun thu a sawi rualin, a duh zawng zawng an tihnunsak ngam lo tih a sawi a, “Signal a chak loh avang hian subscriber an pun hluai hian, an en tha thei si lo ang tih kan hlau a,” tiin an dinhmun a sawi.
Mizoramah World Cup leh TV hi a inzawm ve reng reng a, 1990 hnuah World Cup vang hian TV set hralh a kal thin. Mipuiin TV an en vak loh hnuah pawh TV hi World Cup nen a la inzawm ta zel a nih hi.