US Navy-te beihnaa thi Indian ruangten India thleng

US-in MT Settebello a beih avanga thi Indian pahnih ruang chu India-ah phurh thlen a nih thu Nilaini khan Oman-a Indian Embassy-in a sawi.
X-ah embassy chuan lusun chhungte a tawrhpui thu sawiin ruangte chu India-ah thlenpui a nih thu a tar lang a ni.
Embassy thuchhuah chuan, “MT Settebello beihnaa lungchhiatthlak taka nunna chân – Aditya Sharma leh Shivanand Chaurasiya te ruang chu India-ah hruai thlen a ni a. He hun khirh tak karah hian an chhungte chu thinlung takin kan tawrhpui a ni,” an ti.
Lawng lian, MT Settebello hi kar hmasa khan US sipaiten Iranian lawng chawlhhmun khar an kalpui mek bawhchhiaah an puh avangin an kap a. Lawnga Indian thawktu 24 zinga 21 chu chhanchhuah an ni a, a hnuah mi dang pathumte chu an thi tih finfiah a ni.
External Affairs Minister (EAM) S Jaishankar-a chuan Inrinni khan US Secretary of State Marco Rubio-a kawmin, Gulf-a US Navy-ten Indian pathum an thah avanga India a lungawi loh thu a hrilh tih a sawi a. Sumdawng lawng laka hetiang thiltih hi a dik lo niin a sawi.
X-ah Jaishankar-a chuan, “Vawiin tlai khan US Secretary of State Marco Rubio-a nen kan inbia a. Gulf-a US Navy-ten India lawnga thawk pathum thihna chu India-in a duh loh thu ka sawi nawn leh a. Sumdawng lawng laka hetiang thil tha lo tih hi a dik lo,” a ti.
Zirtawpni khan MEA chuan US Charge d’Affaires Jason Meeks chu Oman tuipui kama sumdawng lawngte beihna kalpui mek chungchangah a lawm loh thu hrilh turin a ko bawk.
Hetihlai hian Evian-a G7 Summit neihah Prime Minister Narendra Modi-a chuan Thawhlehni khan Asia khawthlanga buaina chhuah avanga Strait of Hormuz-a tuipuia sumdawnna a buai leh khawvel eibar a nghawng dan a vei thu a sawi a, Indian civil mite an thih dan a sawi bawk.
Khawvel ramte thawhhona leh inlungrualna chu awmze nei a nih tur thu a sawi a, ram hrang hrangte chuan harsatna inang tlangte hmachhawn tura thawhhona an neih phawt chuan chutiang chu a awm dawn tih a sawi bawk.
Prime minister chuan khawvel hmun hrang hranga buaina leh innghirnghona awmte chu inbiakna, palai intirh leh ram dangte nen tangruala hmalakna hmang chauhva chin fel theih a nih thu India chuan a pawm tlat tih a sawi.
“Asia khawthlanga remna zawnga hma kan sawn zel hi kan lawm hle a. He buaina hian he biala kan thian ramten nunna leh an thil neihte a hloh phah a. Strait of Hormuz kaltlanga tuipuia sumdawnna tihbuai a nih avangin khawvel eibar a nghawng a. India civil mi eng emaw zatin nunna an chân bawk a ni,” a ti.
Prime minister chuan tuipui kawngte humhim a pawimawh thu leh khawvel sumdawnnaa inhnamhnawih tuipuia thawktute himna tur ngaihtuah a pawimawh thu a sawi bawk.
“India chu heng thil pawimawh tak takah hian a thawhpui zawng zawngte nena thawkho turin a inpeih reng a ni,” a ti bawk.