CM leh DPAR minister hlui an tawng

Tun hnaiah Mizoram chief minister leh home minister te chungchangah titi a tam a, chutiang karah chuan an tawng chhuak ve ve a, an thil sawi erawh a inang lo.
Sorkar ding laia pahnihna, home minister K Sapdanga enkawl thin DPAR chu chief minister-in a la a, hei hian titi a siam hle. ZPM party chhungah pawh ngaihdan a inang lo. Chutiang karah chuan thuthar lakhawmtute hmaah an pahnih hian an tawng chhuak ve ve a ni.
June ni 24 khan chief minister Lalduhoma’n thuthar lakhawmtute a kawm a, chuta a sawi dan chuan DPAR minister thin chu an party PAC thu pawh zawm lo, an sorkar hmingchhiatna turah RtI chhanna rang taka petu a ni. Hetih lai hian Zonet Lunglei-in an kawmnaah DPAR minister thin hian chief minister a fak a, term dawt lehah pawh chief minister la ni se a duh thu a sawi.
Chief minister Lalduhoma’n an party PAC-in DPAR chungchang hi 2024-ah an ngaihtuah tan tawh tih a sawi a, “PAC duh dan kha zawm chu lo ni se tun hi kan thleng lo ang a. Amaherawhchu, PAC hian palzut deuhva inngaihna leh, a, rei lutuk deuh nia an hriat avang leh, MZP te leh MSU te meuh pawhina aw an rawn chhuah ve tak hial bawk avang khan, ih, kan meeting leh thleng nghak ila, hemi thlenga thil kan duh dana a kal loh chuan a department hi chief minister-in la ta mai se tih kha PAC thutlukna a ni,” tiin DPAR minister thin K Sapdanga chungchang hi a sawi.
DPAR-a thawkte siksawi an duh niin a sawi a, “A thawktute han siksawi deuh te an duh a, chu chu PAC duh dan chu a ni a. Chu chu tih ni ta se chuan a department chief minister-in chang rawh se tih hi chu PAC thu leh hla a tirah chuan a ni lo. thawktu mal transfer chungchang chiah kha PAC demand a ni a, amaherawhchu, kha kha tiha a awm loh rei deuh tak avang khan a department nen law law hian CM hian chang rawh se an tih phah ta ni berin a lang,” tiin DPAR minister thin chu a puh a ni.
tourism director (additional charge) atana pensioner rawih nawn chungchanga RtI zawhna pawh rang em ema chhangah DPAR minister thin hi a puh a, a sawi danin, May ni 23, Inrinniah zawhna a lut a, a tuk Chawlhni a ni a, a tuk leh thawhtanni zanlaiah a chhanna an pe nghal a ni.
“Khawvelah hian RtI chhan zawng zawngah a rang ber awm e. Ni 25 zan dar 1-ah minister-in a approve hman a ni. Khatiang vek khan kan department0te hi chak sengin a tha awm mang e aw, ka tia,” tiin DPAR minister thin hi a puh a ni.
June ni 20-ah DAPR hi K Sapdanga kut atangin chief minister hian a la a, an party PAC thu anga tih a ni. PAC thutkhawmah hian chief minister hi a chair a ni.
A department laksak a nih lai hian K Sapdanga hi Lungleiah a zin a, Lungleia Zonet Lunglei-in an lo kawmna chu youtube lamah a awm.
“Kan chief minister hi a hnuaia thawh a nuam viau,” K Sapdanga chuan a ti a, minister-te department chan siksawi chu chief minister thu a nih thu a sawi.
Department hrang hrangte hnathawh pawh chief minister hovin an thlir thin niin a sawi a, chumi kawngah chuan a fak.
“A hovin kan review a, a positive em em mai a. Chu chuan min tiphur a, officer-te pawh an phur viauvin ka hria a. Chuvangin chief minister nena kan thawh hona laiah hi chuan, mipui tana sorkar atanga rawng kan bawlnaah hi chuan han sawiselna tur ka hre lo a, a fakawm em emin ka hria,” tiin hemi chungchang hi a sawi.
“Kan chief minister hi kei chu, chief minister atan cent percent-in ka pawm a, a next-ah pawh hian aman min ho peih phawt chuan a ho ngeiin sorkar run leh hi tha ka ti tiin ka sawi mai thin a,” a ti bawk.