2026 BET Awards an sem – Teyana Taylor leh Clipse an langsar
Nimin tuk khan entertainment khawvela mihang te puala chawimawina sang BET Awards chu Peacock Theater, Los Angeles-ah kumin atan an sem leh ta a, award semna show host Druski niin, Teyana Taylor leh Clipse ten award pathum ve ve dawngin an langsar ber a, Kendrick Lamar leh Kehlani ten award pahnih ve ve an dawng bawk. Hetihrual hian nomination lama langsar award dawng lo an awm nual a, Doja Cat (4), Latto (4), A$AP Rocky (3), Bruno Mars (3), Bryson Tiller (3), Jill Scott (3), Chris Brown (3), Metro Boomin (3), Tasha Cobbs Leonard (3), Tems (3) leh YK Niece (3) ten award an dawng lo vek.
Teyana Taylor hian competitve award pathum- best actress, video director of the year leh fashion vanguard award te a dawn bakah Icon of the Year award hlan a ni bawk. Icon of the Year hi honorary award pathum an pek zinga pakhat a ni. Teyana Taylor hi kuminah award lamah a mikhual lo riau a, Golden Globe a dawn bakah One Battle After Another avangin Oscar nomination a nei a, Grammy nomination-ah pawh best R&B album-ah a lang bawk.
Kumin BET Honorary Award dang dawngtu te chu Lauryn Hill leh Sylvia Rhone te niin, Hill hian Living Legend Icon Award a dawng a, he award bik hi BET Awards-ah an vawi khat pekchhuahna a ni a, Rhone hian Ultimate Icon Award a dawng bawk.
Clipse hian ‘Let God Sort ‘Em Out’ avangin album of the year an dawng a, best group bakah Kendrick Lamar an thawhpuina ‘Chains & Whips’ avangin best collaboration an dawng bawk. ‘Let God Sort ‘Em Out’ hi kumin February-a an sem tak Grammy-ah pawh khan album of the year leh best rap album-ah te nominate ni tawin, award a dawng lo thung.
Kendrick Lamar hian best male hip-hop artist dawng lehin, he category-a award dawng ngun ber a nihna sawh nghetin award vawi kua a dawnna a ni ta, a dawng ngun fal hle a, Drake (4) leh Ye (3) ten an dawt.
Kehlani’n best female R&B/pop artist a vawi khat nan a dawng a, he award hi SZA-i’n a zawnin kum thum chhung a lo dawng tawh a, kumin nomination-ah pawh lang lehin, award dawng leh tura rinkai a ni nain, Kehlani kutah a awm ve ta thung a ni. Kehlani hian ‘Folded’ avangin video of the Year a dawng bawk a, ‘Folded’ avang hian February thla khan Grammy pahnih- best R&B song leh best R&B performance a lo dawng tawh bawk.
Olivia Dean-i’n best new artist a dawng a, kumin Grammy-ah best new artist a dawng tawh bawk a, Grammy leh BET Awards-a best new artist dawng kawp thei pangana niin, Alicia Keys, John Legend, Sam Smith leh Chance the Rapper te hnung a zui ve ta a ni.
Cardi B pawhin best female hip-hop artist a dawng a, he category-ah hian award vawi thum a dawnna niin, 2018 leh 2019 khan a kum zawnin a lo dawng tawh bawk.
2026 BET Awards Winners:
Music Categories
Album of the Year : Let God Sort Em Out — Clipse
Best Female R&B/Pop Artist : Kehlani
Best Male R&B/Pop Artist : Leon Thomas
Best Female Hip Hop Artist : Cardi B
Best Male Hip Hop Artist : Kendrick Lamar
Best Group : Clipse
Best Collaboration : “Chains & Whips” — Clipse & Kendrick Lamar
Best New Artist : Olivia Dean
Dr. Bobby Jones Best Gospel/Inspirational Award : “Headphones” — Lecrae, Killer Mike & T.I.
BET Her : “girl, get up.” — Doechii feat. SZA
Viewers’ Choice : “Burning Blue” — Mariah the Scientist
Video of the Year : “Folded” — Kehlani
Video Director of the Year : Teyana “Spike-Tey” Taylor
General Categories
The Fashion Vanguard Award : Teyana Taylor
The Pulse Award : Druski
Film & TV Categories
Best Movie : Sinners
Best Actress : Teyana Taylor
Best Actor : Michael B. Jordan
YoungStars Award : Jazzy’s World TV
Sports Categories
Sportswoman of the Year Award : A’ja Wilson — Basketball
Sportsman of the Year Award : Jalen Brunson — Basketball