Khaw lumin US-a Fourth of July kartawp chawlh hmang turte tuam dawn

US hmun hrang hrang chu tun kar chhung hian hun rei tak leh khaw lum takin a tuam dawn a, chhum lama khaw lum tak, zan boruak uap leh a awm dawn niin khaw chin thlirtuten an sawi.
American-ten Fourth of July holiday weekend hmang tura an inbuatsaih mek laiin National Weather Service (NWS) chuan Thawhlehni thleng khan ram pumah mi maktaduai 120 vel chu khaw lum tak thleng tur vaukhanna hnuaiah an awm mek tih a sawi.
Hmar lamah Canada hmun tam zawk chu Thawhlehni atang khan khaw lumin an tuam tan a, Ontario-ah chuan 37°C thlenga lum a ni.
Khaw lum takin America a tuam tur hi tun hnaia Europe-a nipui tir lama khaw lum uchuak tak, a hmaa an la tawn ngai lo tawnga ram kang leh khawmualpui puma lum ber record an siam mawlh mawlh hnuah thleng tur a ni.
Khaw lum hian ram chhung hmun zau tak, US khawchhak lam tuipui kam atanga ram laili thleng a tuam dawn nia sawi a. Midwest leh Mississippi Valley-ah Ningani hian a vanglai a thleng dawn niin NWS chuan a sawi.
Ningani atangin khawchhak lam hawiin Ohio Valley leh East Coast a tuam zui dawn a, chawlhkar tawp pawh a thleng dawn tih weather service chuan a tar lang.
Khaw lum hi 35-40.6°C inkar leh boruak uap tak a ni dawn a, 38-46°C thleng a ni thei dawn tih sawi lawk a ni.
Chhuna khaw lum ber chhinchhiah chu Ningani leh Zirtawpni hian record tharin a khum rin a ni a, thla khat record leh record pangngai thenkhat pawh kum thei a ni.
Thuneitute chuan khaw lumna hmuna chengte chu pawn lama awm tlem tur te, tui in tam tur leh air conditioner awmna leh cooling centre-a awm turin an ngen.
New York City Mayor Zohran Mamdani-a chuan ruahmanna siam a nih thu a sawi a, Nilaini khan khawpui hmun hrang hrangah cooling center tam tak hawn a ni dawn.
Detroit, Michigan-ah 38°C thleng thei a ni a, mi chengte an intihdaih theihna turin air conditioner awmna hmun tam tak hawn a ni.
World Cup inkhelhna thenkhatah chuan player-te pawl, Fifpro-in inkhelhna atana him lo nia an ngaih aia lum pawh a awm thei.
A lumna ber tur chu Texas a ni dawn a, Houston leh Arlington-a air-condition stadium-a entute chu an kal leh haw lam khaw lum tuar thei tur an ni.
Philadelphia-ah chuan Fifa World Cup Fan Festival an buatsaihna hmun chu Ningani leh Zirtawpni hian puan in dai zawkah an sawn dawn.
Canada-ah chuan Ningani thleng khaw lum zel tura ngaih a ni a, a bik takin Ontario province-ah chuan tun kar chhung hian 37°C a ni thei.
Khaw lum karah Toronto hian Ningani hian World Cup inkhel a khel dawn a, inkhelh lai hian 35°C tling pha tura sawi a ni.
Ontario-ah hian khaw awm dan inralrinna chhawng thuma pahnihna, orange heat warning tihchhuah a ni.
Ontario laili leh khawchhak lam, Montreal telin khaw lum tak a awm dawn niin an sawi bawk a. Inralrinna hniam ber, yellow heat warning tihchhuah a ni bawk.