Document lem leh a behbawm

Taxation department hotute sawi danin, GST registration diltu thenkhat chu, an sumdawnna hmun anga an sawiah hmuh tur an awm lo a, an dilnaa document an thehluh pawh finfiah theih a ni lo. Dilna thenkhatah phei chuan in/dawr luah tur neitute hriat miah lohin an hming hmangin dilna an lo thehlut thin tih hriatchhuah a ni a. Hemi chungchang hi Mizoram Goods and Services Tax Act 2017 angin hmalak dan tur ngaihtuah mek a ni.
‘GST diltute document theh luh finfiah theih a ni lo’ tih hi a pawimawh lai tak chu niin a lang. Finfiah tum lem lovin document an dawn ang ang kha lo pawm liam mai se chuan, document lem hmangin GST registration an lo siam teuh mai dawn tihna a ni awm e. Hetah hian taxation department an thawk tha hle a ni.
Kan hriat angin, lirthei leitute hian lirthei an lei dawnin transport lama register turin tihfel tur pakhat an nei a, chu chu lirthei dahna garage an nei ngei tih finfiahna document a ni. Chutih laiin, Aizawl khawpuiah chuan, garage nei lo, kawngpui dunga lirthei hung ta mai mai hi an tam em em a. Hei hian a entir chu, ‘garage ka nei’ tituten an nei tak tak lo tihna a ni ber awm e. Thuneitu (DTO?) lamin engatinge lirthei an lo register si? tih zawhna a awm nghal ang a. “E le, garage an nei tih finfiahna document an nei miau si alawm” tiin a chhan theih ang. Document chu a dik ngei leh dik ngei loh finfiah a ni lo tihna a ni bawk awm e. Chumi awmzia chu, document lem behchhanin lirthei registration an kalpui zung zung mai tihna a ni.
Dan kalha ram dang atanga Kuhva ro lo lut chungchangah pawh, sawrkar hmasa hun lai khan, Mizoram rorelna in sang ber Mizoram Legislative Assembly House-ah khan GST hmanga Kuhva lakluh a nih thu sawi a ni a. Sawrkar lamin a sawifiahnaah chuan, kuhvaa sumdawngte khawngaihna avangin registered GST hmangin e-way bill siamsak an ni a, ‘sawrkarin mit a siai’ tih tawngkam te pawh hriat tur a awm a nih kha. Khami tum khan sawrkar chuan dik lo takin kuhva-ah khan 5% a la tihna a ni thei bawk ang.
Hemi chungchangah hian House member-ten rorelna in sang berah zawhna an zawh miau avangin sawrkar chuan a zep zo ta lo a, a sawi chhuak a. House member-ten zawt chhuak lo se, sawrkar khan dik lo takin smuggling goods-ah khan GST hmangin e-way bill an siam reng mai dawn tihna te pawh a ni thei awm e. Dan kengkawh tur berin dan an bawhchhia a, dik lo takin sawrkar kalh zawngin sawrkar vekin thil a ti, tihna a ni. Tun hnaia Enforcement Directorate lamin Champhaia mi thenkhat an rawn chhuina pawh kha kuhva kaihhnawiha e-way bill a nih hmel a, cheng vaibelchhe 900 chuang fe a nih kha.
Document hi lo ‘yes’ mai lova finfiah zel a ngai ta a ni ber e.