Khawzawl district-in hralh atan nihawi tel sawrchhuak

Khawzawl district-a loneituten nihawi chi atanga tel an sawr chhuah chu hralh turin burah thun a ni a, hei hi khaw danga zawrhchhuah turin Thawhtanni khan bawrhsap K Vanlalthiana chuan a vailiam.
Sawrkar laipuiin eitur siamna atana kan hman tela intodelh tumin National Mission on Edible Oils – Oilseeds (NMEO-OS) a ruahman a. Hemi hnuaiah hian National Mission for Sustainable Agriculture-a Rainfed Area Development scheme nen lakawpin kum 2025- 2026 chhung khan Khawzawl district-ah nihawi (Variety KBSH 90) chin a ni. Nihawi hi zau (cluster) 6 – Rabung, Sialhawk, Biate, Khawzawl, Khawhai leh Kawlkulhah chin niin, loneitu 120-in tin 98 hmunah nan ching. District agriculture officer Khawzawl hmalaknain tel herna khawl ngaihtuah a ni a, khawl hi hmun thum – Khawzawl, Rabung leh Sialhawkah bun a ni a, tel litre 2000 her chhuah a ni.
Agriculture department Khawzawl District chuan loneitute hnenah nihawi chi, lei lehna, leitha leh FSSAI registration buaipui sakin, tel pack-na tur bur thlengin loneitute an ngaihtuah sak a. DAO leh KVK tangdunin loneitute hnenah nihawi chin leh enkawl dan an zirtir thin bawk.
DAO Lallawmzuali chuan, India ramah ei atana kan hman edible oil zaa 60 hi ram pawn atanga lakluh a ni a, tela intodelh theihna turin India sawrkar chuan NMEO-Oilseeds Mission a kalpui a, nikumah Khawzawl district pawhin he Mission hnuaiah hian nasa takin nihawi chin a ni a, amaherawhchu nikum lamah ruahsur mumal lo/ pawl delh ruah a sur leh avangin beisei ang tak an thar phak lo tih a sawi.
Kumina an tel her chhuah litre 2000 vel atang pawh hian loneitu tam zawk chuan a kum khat tla an thar hrim hrim tho tih a sawi a. Nikum lamah khaw 6-ah nihawi chin a ni a, an hmalakna leh an tel thar an hmuhin loneitu tam zawk leh la ching ve ngai lo khua pawhin chin an duh tih an rawn report zel a, kuminah tuna tel an thar aia tam zawk hi an thar ngei an beisei tih a sawi a ni.
DAO sawi danin, nihawi hi nikum lamah leiletah buh seng zawh hnuah chin a ni a, kum danga thlai ching loa leilet lo dah awl thinna hmunah hun reilote chhunga thar theih, tha leh sum sen ngai em em loa chin chu loneituten zawngchhang thlak an ti a. Kuminah pawh a tam zawkin buh seng zawhah chin an tum a, hemi inbuatsaihna atan hian loneitute hnenah buh thar rang chi chin tir an ni.
Bawrhsap K Vanlalthiana chuan, loneitu 120-in ngaihtuahna thar leh smart tak nei a, nihawi ching a, a tel an her chhuak thei chu lawmawm a tih thu a sawi a. An tel her chhuah chu an sum lakluh zat atang chauha a hlutna teh loin, ngaihtuahna thar an neihna leh tel tha leh hrisel zawk an her chhuak chu a hlutna dik tak a ni, tiin, hun lokal zel turah pawh hei aia tam leh tha zawk thar chhuak turin duhsakna a hlan tih a sawi a ni.
Nihawi tel thar chhuak tam loneitu pathum hnenah bawrhsap hian lawmman a hlan a. Litre 237 herchhuaktu Khawlnunpuia, Biate bakah R Lalrualliana, Biate (litre 204) leh Lalhriatpuia, Biate (litre 149) an ni.