Rohingya 500 chuang phur lawng pahnih chesual

UN agency-te chuan Myanmar vaukamah mi 500 chuang phur lawng pahnih an pil tih an sawi.
Ningania International Organization for Migration (IOM) leh UN refugee agency (UNHCR) te chuan an hriat chinah lawng pahnih hian June thla tawp lam khan Myanmar-a Rakhine State an chhuahsan a, a chuang tam ber hi Rohingya an ni tih an sawi.
Lawng pakhat, mi 250 chuang chuanna ni ngeia hriat chu an chhuah hnu lawkah biakpawh theih loh a ni a. A hnuhnung zawk hi mi 280 vel chuanna niin July 8 khan Myanmar-a Ayeyarwady vaukamah a pil niin an sawi.
“Thil thleng leh thi zat hi engmah chiang a la awm lo va, UNHCR leh IOM chuan nunna tam tak erawh hloh a ni thei tih chiang takin a hria a ni,” tiin thu an chhuah.
He thil thlen hma lawk hian Andaman Sea leh Bay of Bengal-ah mi 300 chuang thi leh chin hriat loh an awm bawk tih an sawi a. Heng mite hi Rohingya raltlan leh Bangladeshi an nih thu an sawi.
Rohingya-te hian a sang biin tun hnai kum eng emaw ti chhungin Myanmar leh Bangladesh-a raltlan awmna an kar tawn reng a. Tun ang hun, fur ruah a tam lai hian a hlauhawm avangin lawnga zin erawh an pumpelh hram thin a. UNHCR leh IOM pawhin tun hnaia ruah sur nasa leh tui lian avangin a hlauhawm zual tih an sawi.
Ram mumal nei lo, Muslim Rohingya maktaduai 1.2 chuangte hian Myanmar-a venhim hna thawktuten an chunga tharum an thawh nasat avanga tlanchhiain Bangladesh-ah an awm a. Tun hnaiah US leh ram dangten an puihna an tihtlem nasat avangin an awmnaa an thil dawn thin a tlem phah hle.
Kum 2017-a sipaiten Rohingya sang tam an thah hnuah him taka Myanmar-a kir leh thei dinhmunah an ding rih lo va, sipaite chetna hi ‘insuatna’ tiin an ngaihsak a. Tunah Myanmar-a Rohingya chengte chuan khuahkhirhna nasa tak an la tawh a, Rakhine-a hel pawlte pawhin an awmna ram chin thunun tumin sipaite an bei nasa hle bawk.
An tawrhna avang hian Rohingya tam tak chuan lawnglengin tuipui hlauhawm tak kâna Malaysia lut an awm reng bawk a. Nausen, naupang leh nau pai lai telin mi sang tel an tlanchhiatna lamah an thi tawh.
IOM leh UNHCR chuan chhiatna thleng chu Rohingya-te ngaihsak a tulzia tilangtu a nih thu an sawi.
Kum 2025 khan Rohingya 6,500 an tlanchhia a, mi 900 dawn thi leh chin hriat loh an awm a, lawnga tlanchhiat tum Rohingya-te thih tam ber kum a ni.