Hna zawh hleihtheih loh hna tha bawk si lo enfiah

Mizoram State Project Monitoring Committee Inspecting Team chuan Eklavya Residential School Tlungvel sak mek chu tunhnai khan an endik.
Eklavya Model Residential School (EMRS) Tlungvel hi sawrkar laipui Ministry of Tribal Affairs hnuaiah hmun kilkhawr zawk ami, schedule tribe (middle leh high school level) ten national standard zirna a thlawna an hmuh theihna tur, facility hrang hrang awmna, tender amount cheng vaibelchhe 24, agreement amount vbch. 23.3361 a VRS Construction Zonuam Aizawl-in a sak mek a ni. Hna zawh hun tura ruat 2021 December 20-a an zawh loh avanga hun pawhsei – 2024 December 21 a ral leh hnu tun thlengin an la zo loa, nasa taka tih khawtlai a nih chhan a hmunah endik niin, a hun taka zawh a nih loh avang hian zirlaite tan harsatna lian tak thlentu a ni tih sawi a ni.
MSPMC Inspecting Team hian 2024 June 7 khan EMRS Tlungvel sak hna component hrang hrang hi plan anga sak a ni em, tih a lo endik tawh a. Hemi tum hian hna hi zaa 55 zawh ni tawhin, contractor hnenah sum vbch. 15.94 pek a nih tawh tih thu dawn a ni.
MSPMC Team hian EMRS Tlungvel component hrang hrangah hian duhthusam lo leh siamthat dan turah rawtna engemawzat a lo siam tawh a. Chu’ng chu a taka zawm a nih leh nih loh tun tumah hian an endik tel.
Hna thawh zawh loh leh thawh kim loh bakah hna thawh tha lo leh pawm tlak loh a tam hle tih an sawi a. Hmanrua a tha tawk em, tih leh, concrete quality thlengin an test leh a ni. MSPMC hian EMRS Tlungvel hi tangkai taka chhawr theih tura zawh fel a nih thuai theihnan hma a la zel dawn tih a sawi a ni.