Mizoram sawrkar leh World Cup

Khawvel huapa sports discipline hrang hranga inelna lian ‘World Cup’ hi a tam khawp mai a; mahse tuna World Cup kan tih hi chu kan hriat tlan sa, FIFA World Cup 2026 a ni. Engatinge Mizoram sawrkar nen kan thlunzawm tak mai kan tih chuan, World Cup denchhen hian Mizoram state sawrkar chuan chawlh a lo puang ve tlat a ni.
Football ngaina hnam kan ni, han inti dawn ila, football ngaina hnam chuan World Cup te an khel phak mai a, keini hi eng nge kan dinhmun ve chiah? Vawi khat mah FIFA World Cup khel tura la qualify ve miah lo India ram state zingah pawh a thawkmawh (uar hret em?) ve tak hian sawrkar office khar hial khawpa kan lo buaipui ve chiam mai hi, inenfiah deuh chu a tul lo’ng maw?
‘Sawrkar office chawlh’ han tih rup mai chu lo helh duh tawk an awm maithei; ‘ni chanve chauh alawm’ ti duh an awm bawk ang. Ni khat pum hlum a ni emaw, ni chanve a ni emaw pawh ni se, sawrkar office kal pangngai chawlhsan a ni tawh hrim hrim a, helai hi chu sawi thui lovang.
Zirna in, school leh college an chawl a. Hei pawh hi a nihna takah chuan ‘zirlai ten an en duh ang’ tih chhuanlam ang deuha lang, zirtirtute kaihhnawih tho a nih hmel. Chawlh hi puan ni lo ta se, World Cup Final hi zirlaite leh zirtirtute hian an en dawn tho a, World Cup an en chuan tlaivar a ngai dawn a. Chhun lamah school/college-ah mutchhuak chungin eng ruai an ang tak tak chuang lovang, tiin chawlh hi sawrkar hian a puang ta mai em ni ang? Nge, ‘football inkhel an en atang hian football lamah hmasawnna nasa tak Mizoramin a neih phah ang’, an ti nge, ‘a hun lai a nia, intihhlim hi kan mamawh ve alawm’ an ti zawk?
Mizoram sawrkar hnuaiah hian sawrkar hnathawk singnga chuang an awm a, school leh college zirtirtute bak, department dang office-a thawkte hi sawrkar hnathawk zawng zawng hmun thuma thena hmun khat, sing hnih vel angah dah ta ila. Sawrkar hnathawk mi singhnih ni chanve thawh hlawh leh, sawrkar hnathawk mi singthum ni khat thawh hlawh chu Mizoram sawrkar hian World Cup avangin a hloh ta a ni ber mai, thildang a awm lo.
State thenkhat, heng Kerala, Meghalaya, West Bengal leh Manipur-te pawhin chawlh an puang ve a, mahse anni erawh chuan educational institution tan chauh a ni a, sawrkar office chawlh a tel ve lo. State dang chu state dang lo ni se, tih dan tha entawntlak an nei a nih chuan entawn te chu hreh lo ila; mahse, World Cup chawlh tih vel hi chu tih dan thaa ngaih tur thil em ni dawn le? Thil hi, a huau huau zawnga thutlukna siam kawngah kan hnip lutuk deuh em tih te pawh hi, inenfiah ve thin ila.