Kundan hnena pek tak Small Hydel Project-te tun dinhmun

R.Lalrinkima
Hidden Lodge
Chanmari, A izawl

Hman deuh khan Mizoram sawrkar chuan Small Hydel Project 7(pasarih) te chu Kundan Green Pvt Ltd hnenah a lo pek tawh thu kan tarlang tawh a. Chung Small Hydel Projects(SHP ti zel tawh mai ang) hrang hrang te atanga ‘Free Power Supply’,(an thar chhuah za zel atanga a thlawna kan hmuh tur) han tarlang hmasa phawh teh ang:-
1) Serlui B (12MW) —20%,
2) Maicham Phase-I
(2.00MW)— 20%
3) Maicham-II
(3MW)—17%
4) Tlawva-(5.00MW)—17%
5) Tuipui(0.50MW)—17%
6) Serlui A(1.00MW)—28% leh
7) Tuipanglui-(3.00MW)—17%
te an ni.

Heng zingah hian Serlui A SHP (hei hi Aizawl bul, PHE tuilakna Reiek kai bula awm a ni a,thangkhat lian zet tui dawt tur a awm tak loh vang leh tuilakna(Channel) chhia siamthat tak loh vanga hnathawk tawh lo a ni a. Tin, Tuipanglui SHP hi tui kawng (power channel) thir pipe lian leiminin a tih chhiat bakah khawl khawhvir tur tui dahkhawl lailawkna(Forebay) pawh he pipe chhia hian a pawh chhiat tel avanga reitak hnathawk loa a wm hnuah pawisa tam tak senga heng leiminin a tihchhiatte hi siam that an nih hnu pawha la hman theih loh a ni a.(hman theihloh anihna chhan tak chu a kipkawiin ka hre lo) Heng hrereng chung hian Kundan Green Pvt Ltd te chuan hnathawk(power pe chhuak) leh theia siam theih in beiseiin an kutken tawh dawn a ni. Tin, Tuipui SHP hi Champhai bula awm niin reitak hnathawk thei loa a awm hnuah siam that a ni a, December 2024 hnulamah khan power a pe chhuak leh ta rih lo a,(heipawh hi a chhan ka hre lo) hetichung hian Kundan GPL te chuan an kutken turah a tel bawk a, power pechhuak leh theia buatsaih an tum bawk ang.
SHP pasarih(7) zinga khing a chunga tarlante bakah Tlawva SHP,Serlui B SHP,Maicham I&II SHP ten thla riat(8) chhunga an power tharchhuah, a sum hlutna anga keima lo chhinchhiah ve te ka han tarlang lawk ang e(power tharchhuah unit khat man hi average in Rs 5.85p angin chhut a ni):-

Serlui B SHP (23.8.2024 to 23.4.2025) = Rs 749,14,122.00
Maicham Phase-I (23.8.2024 to 23.4.2025) = Rs 74,72,571.00
Maicham Phase-II (23.8.2024 to 23.4.2025) = Rs 80,52,435.00
Tuipui (23.8.2024 to 23.4.2025) = Rs 11,50,022.00
(Heng hi Department-a ka awm hun tawp dawn lama nitina power kan thar chhuah, State leh Central Sector, report P&E Department in a tarlan atanga kuthlei thila ka lo chhut ve na a ni a, ka rate hman pawh hi ka thawhpui Engineer thenkhatte’n ‘awm min tihpui’ ang a ni e)
Sawrkar hna May 2025 atanga ka chhuahsan tak hnu khan Kundan GPL hnena heng projects te hi engtikahnge hlan fel an nih hun chiah engmah ka hre tawh lo nain a chunga kan tarlan te zingah khian Serlui B SHP hian reitak generation a la nei nain tumkum February thla laihawl atang khan Kundan GPL ten cheithat hna an thawh tan avangin power pekchhuah a ni ta lo a, kumdanga ka chhut anga khawl tlan la ni ta se la, hetiang hi kan sum hloh dan tur niin a lang:-

Serlui B SHP (7.2.24 to 24.4.25) = Rs 261,02,053.00
Maicham Phase-I SHP (23.8.2024 to 23.4.2025) =Rs 74,72,572.00
Maicham Phase-II SHP (23.4.24 to 23.4.25) = Rs 80,52,435.00
Tuipui SHP (23.4.24 to 23.4.25) =Rs 11,50,022.00
Sl No 2 to 4 te hi Department tan enkawl a rem chiah tawh loh avangin fur ruahtui a lo tlak tan a khawlin eng a pekchhuah veleh theih hunah an chawl zui ta a ni. Tihian, Kundan GPL hnena kan SHP te a awm tak china kan sum hloh ni thei ta chu Rs 427,77,080.00 a lo ni ang. Serlui B SHP hi 4MW khawl pathum(3) niin khawl khat chauh(4MW) a tlan kumtluan thin a, khawl pathum hian an tlan lo tih theih a ni a(tlan ve zeuh hun chu an nei a, a reilo hle thung)
Tichuan, sawrkar leh Kundan GPL te inremna ang chuan Serlui B SHP tharchhuah atanga 20% free power man chu kan sum sumkar tur a ni ang a, chu chu (20% of 794,14,122.00) Rs 158,82,824.00 a ni ang a, a bang zawng (794,14,122—158,82,824) Rs 635,31,298.00 chu Kundan GPL te chuan an pumbilh dawn ta a ni. He sum an hui tak tur hi a hlutna Rs 5.85p per unit anga chhut a ni a, an ni hian min lei tirna tur chu Power Purchase Agreement siam ang a ni dawn a, hei hi engzat chiah nge ni tih ka hre zui ve ta la. Tuna State pawn atanga kan lak luh man average Rs 7.00 per unit ang ni ta se, an hlawkna khi a la pung sawt dawn tih a chiang a ni. Chutiang zel in Maicham-I&II leh Tuipui te pawh khi free power kan dawn tur hlut zawng a pawisain han chhut ila, Zoram chhunga kan tui ngei hmanga an hlawkna an tel tur tur hi tam tham tak a ni.
Eng pawh chu ni se, ngaihtuahna uluk tak senga kan sawrkar hian he ruahmanna hi siam a ni a, Cabinet Meeting Agenda(proposal) ka hriat ve chinah chuan ti hian zotawngin tawi fel deuhin han dah chhin ta ila- ‘Heng khawl te hi kumtluana tluangtaka tlan tir thei tur chuan fund neihsa neih a ngai a, chungte chuan khawl part chhia te thlak zung zung a ni ang a. Nimahsela, chutimaia fund hi hmuh zung zung theih anih siloh avang leh hmuh pawhin a tlai thin avangin heng khawlte hian an kumkhat thar chhuah a tlem phah em em a. Hei hi project enkawlna tur fund chungchanga harsatna anih avangin kan Hydro Plants te hi tip top conditiona dah reng an harsa a ni.
Hetih lai hian firm thenkhat kan khawl te cheihnuma sawrkar sum telloa kum 40 chhung enkawl a, free power pawh percentage engemaw zat royalty anga min pek huam an awm a. Heng free power baka power thar chhuah chu State in firm te nena inremna angin kan lo lei ang bawk dawn a ni. Hetiang hi heng SHP te kan outsource dan tur chu a ni a, profit margin(free power) erawh State sawrkar tan chuan a tlem hle(minimal) ang’ tih te an ni.
Fund neih mai harsatna chungchang tarlan khian State sawrkar in Small Hydel Project hi a tuipui chiam lo a, funding chungchangah mawngvawmba angin tha a thawh duh lo a, a mawng a hlim tih te pawhin a sawi theih awm e. Power-a intodelh tur hian potential tha tak neiin kan insawi fo naa kan intodelhna khawp power siam chhuak tur hian state a retheih avangin a kalkawng a thui em em a ni. Tun sawrkar pawh hian Tuirini(24MW) leh Tuivai (132MW) hi tunhmaa sawrkar hmasa ten hma an lo lak tawh an buaipui chhunzawm lem loh rawn thar thawh leh an ni a. Hmana ka ziah tawh ang khan Tuirini SHP hi BRICS Loan hmanga thawh tura tihfel diam tawh Covid vanga pawisa harsat lai a nih vanga Pu Zoramthanga’n ‘thawh rih loh mai ni se’ a tih kha a ni a, kawng thui tak zawh zo tawh mahse hei hi a hmawr bawkna chu a ni a. Tun sawrkar hian he kawng hlui tho hi rawn zawh velehin tunhnaiah khan Chief Minster in lung te pawh a phum ta kha a ni a,engtiang takin nge an sawrkar chhung hian an kalpui ang tih hi lo ngaichang ila.
Tin, Tuivai pawh hi Viability Gap Funding, India rama Hydro Power Project atana hmasa ber tura Congress term hnuhnunga kawng zawh zo thawkhat tawh, mahse sawrkar tharin a bawhzui tak loh kha a ni bawk tih ka han tarlang leh hrim hrim a ni e.