Khuh damdawi a hluar leh
Ruihhlo a hluar han tih hian rilruah heroin a lang chawk a, heroin hi a hluar reng bawk. Ruihhlo chi dang pawh a hluar a, ganja pawh a hluar mek. Khuh damdawi pawh tunlaiin a hluar leh tawh an ti.
Mizoram Excise & Narcotics (MEN) department hotute sawi danin, tunlaiin Mizoramah khuh damdawi a hluar a, hmun hrang hrangah awlsam takin a lei theih. Hei hi theihtawp chhuahin an do mek.
Man tur a tam an ti a, man pawh an man hnem a ni awm e. Tleirawl zingah a hluar an ti a, an man dan atanga chhut chuan Mizoram chhim lamah a hluar zual nia a lan thu an sawi.
An sawi danin, MR (Medical Representative) te’n an rawn keng a, courier lama a hlawma chah an awm bawk a, damdawi dawr neiah pawh an license-in a phal baka lo hralh an awm bawk.
“Awlsam taka lei theih a ni a, tleirawl te te, high school leh higher secondary school kal rualte hian an intihhmuh a. Heti lam hi ngaihven a ngai khawp mai,” MEN hotu pakhat chuan a ti.
Health & Family Welfare department hnuaia Food & Drugs Administration (FDA) wing lam pawhin khuh damdawi (codeine syrup) a hluar thu an sawi a, Mizorama lakluh a tam an ti.
Mihring tana siam, damdawi pawimawh leh dam lote mamawh a nih miau avangin a siamtuten an siam reng a, a lakluh hi lo khap ngawt theih a ni lo tih an sawi a, amaherawhchu, hman sual a nasat avangin a chuang a liama lakluh a nih loh nan wholesaler-in a lakluh zat tur, retailer-in a kawl zat tur ruahmanna siamin a bawhzui thin a ni tih an sawi.
Dawr tam takin an zawm laiin, zawm tum lo, sum siam nana hman tum ni awm tak an awm reng tih an sawi a, dan zawm lo wholesaler leh retailer lian tak takte licence pawh FDA chuan a lo cancel fo tawh tih an sawi bawk.
FDA hian June thla khan khuh damdawi (codeine syrup) bik khuahkhirhna khauh zawk an chhuah thar a, wholesaler-in thla khatah codeine syrup bur 1000 aia tam a chah lut tur a ni lo tih te, retailer-in thla khatah bur 100 aia tam wholesaler hnen atangin a la tur a ni lo tih te a ni.
Khuh damdawi (codeine syrup) hi doctor lehkha nen chauhva lei theih a nih laiin tunlaiin doctor lehkha tel lo pawhin a duh tan chuan a neih theih mai tih thu dawn a ni.