Bar thla tira international football chawlhsan tum ve tawh Ronaldo!
Bar thla tira international football chawlhsan tum ve tawh Ronaldo!
Portuguese football icon Cristiano Ronaldo chuan World Cup vawi ruk a khelhnaah pawh a trophy cabinet-a kim lo lian ber chu World Cup trophy a la ni zui ta zel a, kumin September thla hian international football chawlhsan turin thutlukna a siam fel tawh niin media thenkhatin an tarlang.
Ram tana kum 23 zet khel tling tawh Ronaldo hian bar thla UEFA Nations League match-a Wales an tum hunah hian Portugal tan a han khel leh zet ang a, hei hi international football a khelh tawpna tur atan a hual niin an sawi.
Kum 41 mi ni tawh Cristiano Ronaldo hma lam hun chungchanga thu thar ber hi Gulf News tarlan dan chuan, Portuguese agent pakhatin Jordanian journalist hnena a sawi niin, Jose Alvalade Stadium-ah Wales match a han khel leh zet ang a, Portugal tana inkhelh a bansan ve tawh dawn a ni.
A thuthang a awihawmna pakhat chu he stadium ngei mai hi kum 2003-a Ronaldo international debut kan hmuhna khelmual kha a ni a, a bultanna stadium-a ngeia a hmawr bawk leh a tum a nih pawhin a inhmeh zaih awm e!
Ronaldo hian Portugal tana trophy lian pathum a chawi tawhna kawngah world record hraw pui pui pahnih siamin, pakhat zawk chu international goal khung hnem ber (146) nihna leh a dang chu ram tana khel hnem ber (233) nihna a ni.
International career-ah hian assist ngawt pawh tum 46 a nei tling tawh bawk.
Portuguese football legend chawlh hun tur chungchang hi Jordanian journalist Mohamed Awaad an tih chuan X lamah post siamin a thehdarh a, a ziah dan chuan: ‘Portuguese agent pakhat nen kan inbia a, a news min hrilh chu Portugal tan match khat a han khel leh zet ang a, chu mi hnua Cristiano Ronaldo chawlh ve tawh tur thu niin, Lisbon club stadium Jose Alvalade-a Portugal-in UEFA Nations League-a Wales an mikhualna match hi ram tana a game hnuhnung ber a ni tawh ang’ tiin.
Ronaldo international achievement neih tawhte hi major trophy pathum kan ti a, chu’ngte chu – UEFA Euro (2016) bakah UEFA Nations League title pahnih (2019 &2025)-ta an ni.