Kuminah ruihhlo man hnem leh tawh

Mizoramah heroin a hluar mek a, man tur pawh a tam, man pawh an man hnem. Police leh excise force te’n kuminah heroin hi an man hnem leh tawh hle.
Mizoram Excise & Narcotics (MEN) department-in kuminah July ni 23 thleng khan heroin hi kg 15.690 an man tawh.
2025-ah khan MEN department hian heroin hi kg 35.283 an man a, 2024-ah kg 46.680 an man. 2023-ah khan kg 76.058 an man a, 2023 kha an man tam ber kum a la ni. Chumi hnuah kum hnih chhung chu a tlahniam rih.
Mizoram Police-in kuminah June thla thleng khan heroin hi kg 34.923 an man bawk a, police te’n June thla thlenga an man leh MEN department-in July ni 23 thlenga an man hi belhkhawmin kg 50.613 a ni. Kum chanve vel chhunga manah chuan a tam tham hle.
YMA te’n engemaw zat an man a, police leh excise force te’n an man hnem bawk. Man loh hi a tam zawk tura ngaih a la ni lehnghal!
Police leh MEN department hotute chuan Mizoram hi ruihhlo tawlh kawng a nih thu an sawi a, Mizorama heroin an manah hian hmun danga mi tur a tam tih an sawi. Vawi khata tam thama an man phei chu Mizoram pawna mi tur a ni tlangpui tih an sawi a ni.
Ram dang atangin ruihhlo la turin Mizoramah an rawn kal nasa tih an sawi a, khawchhak lam atanga Mizorama lo lut hi ram dang atanga an chah a tam a, chung chu lirthei kengin an rawn la thin an ti.
Manipur an buai hnuah Mizoramah ruihhlo man tur a tam tih an sawi bawk a, Manipur a chep avangin, a hmaa Manipur paltlanga tawlh thinte khan Mizoram lam an rawn hawi tih an sawi.