FCRA siamthat tumnaah CM hoin HM sawipui tum

India sawrkarin Foreign Contribution (Regulation) Act siamthat a tum dan chu pawm theih nia an ngaih loh avangin Mizorama kohhran hruaitute chuan chief minister hoin Union Home minister Amit Shah hmaichhana sawipui an tum.Inrinni khan chief minister Lalduhoma hian a chenna bangla-ah Mizoram Kohhran Hruaitute Committee leh Council of Churches in Mizoram hruaitute kawmin, Foreign Contribution (Regulation) Amendment Bill 2026 chungchang an sawiho a. Tuna a Bill duan ang ngau ngau hi chu pawm theih loah ngaiin, tihdanglam rawtna memorandum chu state sawrkarin lo buatsaih se, chief minister ho hian Union Home minister hmuh nise, MKHC leh CCM hruaitute nen memorandum hi thehluh nise, an ti.
Sawihonaah hian chief minister hi a adviser pahnih – Lalmuanpuia Punte leh TBC Lalvenchhunga ten an tawiawm a ni.
FCRA Amendment Bill chungchangah hian sawrkar lai ZPM thuneitu sang chuan an lo sawiho tawh a. A Bill ang ngau ngau hi chu pawm chi ah an ngai loa, kohhran hruaitute sawipui phawt nise, tiin an lo dah tawh a ni.
Chief minister hian kar kalta Zirtawpni khan he amendment kalpui tura an duh dan sawrkar laipuiah an thlen anga, an thu thlen hi an pawm theih chuan Mizoram MP-ten tha takin Parliament-ah sawrkar lai an thawhpui anga, an rawtna an pawm thei lo a nih erawh chuan an dodal dawn tih a lo sawi tawh a ni.