Hnam leh sakhaw himna atan leh hma- sawnna atan min zui turin kan sawm – Congress Thalai president

Mizo hnam leh sakhua himna atan leh ram hmasawnna atana inpe thalaite zui turin an sawm tih Congress Thalai president Ngurdingpuia Pachuau chuan a sawi.
Thawhlehnia Congress Thalai Hqrs. hruaitu tharte inhmuhkhawmnaah an president hian, Congress Thalai-in sawrkar khalh ngil kawngah leh Mizoram mipui tan nasa lehzualin hma an la tan leh dawn a. Sawrkar kal dik lohnaah pawh mipui pawisakna awm loa tawngkam thiamna avanga sawimam tumna chu na takin an do dawn a, thil dik phawrhin siamthat hna an thawk dawn tih a sawi.
Central-ah mipuiin BJP an hnawl a, BJP sawrkar leh a fawng vuantute paih thlak an duh a, an paihthla mek tih a sawi a. Union Education minister Dharmendra Pradhan ban tir a nih tawh bakah Road Transport & Highways minister Nitin Gadkari chu bang turin thalaiten August 4-ah Delhi khawpuiah nawrh an huaihawt leh dawn tih a sawi.
Narendra Modi pawh India ram thalaite fiamthu thawhna hmanrua ber a ni chho ta tih sawiin, “BJP leh a fawng vuantute paihthlak hi India thalaite thunawn a ni a. Hindu sakhaw vuantu tam takin BJP sawrkar leh party avangin BJP leh Hindu thahrui RSS an bei nasa a, Haryana BJP MP leh Assam-a BJP minister faten BJP beia nawrh huaihawttute an zawm tawh. BJP color nena khawlai len pawh thil him lo a ni tawh,” a ti.
“Mizoram, kan hnam kan sakhaw himna atan leh hmasawnna atana inpeten min zui turin Mizoram thalaite ka sawm a. Chutiang hna thawk tur chuan Congress Thalai kan inpeih a, chutiang ti thei tur pawhin Pathianin min tanpui kan ring tlat a ni,” Ngurdingpuia Pachuau hian a ti bawk.