Deschamps hun a liam Zidane a lo lang

World Cup 2026-ah final lut zo ta lo France chuan head coach thar an nei a, kum 14 chhung zet lo enkawl tawhtu Didier Deschamps hmunruak luahtu atan an player ropui ni thin Zinadin Zidane an ruat fel.
World Cup a France lo champion pui tawhtu Deschamps chuan World Cup-ah pathumna zawnnaa England an hneh loh rual khan a lo sawi lawk tawhin a nihna a bansan zui nghal a. Kum 14 chhung zet a lo enkawl tawh France national team a mangtha a, a chawl hahdam ve rih dawn.
Deschamps hian kum 14 chhungin France hi vawi 120 hnehna a chanpui a, an khingpuite nen vawi 28 an inhnehtawk laiintlawm zawkah vawi 35 an tang ve thung. France hi World Cup 2018-ah a champion pui a, player ang leh coach anga World Cup-a champion thei pathum zinga pakhat a ni.
World Cup 2022-ah final lut leh bawk mah se Argentina lakah an vanduai a, an champion zo lo. World Cup 2026-ah semi-final lut bawk mah se champion zui ta Spain hneh lovin an tlawm. france hi Nations League 2020-21-ah a champion pui bawk a. Euro 2016-ah final lut bawk mah se Portugal lakah vanduaiin an chak zo lo. Hnuhma tha pangngai tak hnutchhiah chungin head coach nihna a bansan. World Cup 2026 tawp rualin a contract a hmang zo a, a chawl zui ve ta a ni.
Zidane a lo lang
France player ropui ber ang hiala ngaih Zinedine Zidane hian World Cup 1998 ah khan France a champion pui a, 2006-ah final lutin ‘Golden Ball’ dawng bawk mah se Italy lakah an vanduai a, an champion zo lo. Euro 2000-ah France hi champion pui bawk mah se World Cup 2002 leh Euro 2004-ahte beisei phak lo takin an inlan. Hun duhawm lo tak an tawn vangin Zidane hian international football a chawlhsan hman hial a, 2006-ah a let leh thung.
France tan hian inelna hrang hrangah vawi 108 khelin goal 31 a thun. Kum 2006 atangin international football a chawlhsan. Club tan pawh inlan zui zel tawh lovin player angin football a chawlhsan.
Player anga football a chawlhsan hnuin coaching a luhchilh zui a, kum 2016 atangin Real Madrid a enkawl tan a, kum hnih a enkawl hnuin ban a ni. Kum 2019-21 chhungin Real Madrid hi a enkawl zui leh. 2021 a hna a bansan hnuin club enkawl a la nei leh lo. An ram team hi enkawl a chak viau a, Didier Deschamps chhuah hun a nghak deuh chawt a, a nghakchhuak ta nge nge a ni.
Zidane hian Real Madrid a enkawl chhungin La Liga-a vawi hnih a champion pui a, Champions League-ah vawi thum ngawt a champion pui bakah UEFA Super Cup leh FIFA Club World Cup-ahte vawi hnih ve ve a champion pui bawk a, coach ang pawhin hnuhma a nei tha viau.
Player a nih lai atanga an ngaihsan em em, coach a nih hnuah pawh an zah em em Didier Cheschamps hun a liam a, France captain hlui leh coach tha tak ni bawk Zidane hun a inherchhuak ve thung. Footballer ropui leh coach ang pawha hlawhtlinna sang tak Zidane hnuaia chona thar hmachhawn hi player ropui tak tak France player te pawhin a phurin, an nghakhlel tawh viauin a rinawm.
France player tha berah vawi hnih thlan lo ni tawh leh Ballon d’Or meuh pawh lo dawng tawh a, FIFA Player of the year chawimawina pawh vawi thum ngawt lo dawng tawhtu Zidane hnuaia khelh chu player tin tan chona leh chawimawina tling a ni ngei dawn. Zidane tan ngei pawh hian an ram team enkawl chu chawimawina a ni ve bawk ang
France hian September ni 25 khian Nations League-ah Turkey an hmachhawn dawn a, hei hi Zidane hnuaia an inlan hmasak ber tur an ni ang.