Japan chhimthlanga lirnghingah mi 13 thi

Lirnghing na takin Japan chhimthlang lam a sawiah mi 13 thi an awm tawh a, chhanchhuah hna thawktuten in chim chhe karah dam chhuak an awm em tih an zawng mek zel.
Magnitude 6.8-a na hian Thawhlehni zan khan Kumamoto prefecture a sawi a, kawngpui leh in tam tak a chhia a, rel kawng khar a ni a, mi tam tak insaseng ngaiin an awm.
Thi zinga pathum chu Kashima-a Aeon Mall chhawng hnihna thenkhat chima mite niin fire department chuan a sawi.
Prime Minister Sanae Takaichi-i chuan thite sunna leh emergency service-ten theihtawp an chhuah avangin lawm thu a sawi.
Takaichi-i chuan, “Hun a liam mek zel,” tiin Nilaini tuk khan a sawi.
Japan Meteorological Agency (JMA) chuan magnitude 7.1-a na nia an sawi laiin US Geological Survey chuan 6.8 tiin a hnuah sawi thung.
A nghin tanna hi Kumamoto khawpui chhim lam km 20 vela hla, lei hnuai km 10 vela thuk a ni.
A bul lawk, Kashima-a fire department chuan Aeon shopping mall-a ‘chhawng hnihna a chim’ tih an sawi.
Video darhah chuan shopping centre atang hian meikhu var tak a chhuak a, lirthei hunna lam pana mi tlanchhe lai te a lang a. Mall pawn lam hmun zau tak chu a chim sawm nuai a, thir beam a inbang nuai bawk.
Mi pariat chhanchhuah niin AFP news agency chuan a tar lang a. Engzat nge tang awm tih hriat a nih loh thu tual chhung broadcaster NHK chuan a tar lang a, mi 20 atanga 30 vel nia rin a ni.
Aeon Mall hi ram puma inzar pharh niin Japan-ah hian centre 160 chuang an nei a. Department store, incheina, damdawi leh ei tur an zuar thin.
NHK chuan kawng khi chhia, lei chim leh in kang video te a tilang a. Rel tlan tihtawp niin chenna in tam tak electricity an nei lo.
International Atomic Energy Agency (IAEA) chuan lirnghing avangin ‘a intanna atanga km 100 vela hla, Sendai Nuclear Power Plant chu chhia leh him loh phah a awm lo va, dan pangngaiin hna a thawk’ tih X-ah an tar lang.
Prime Minister Takaichi-i lirnghing la awm karah chhanchhuah hna thawk turin sipai 3,600 tirh an ni tih a sawi a. Japan-a Meteorological Agency chuan nghing nawn 60 chuang awm lehin magnitude 1 atanga 4 inkar a ni hlawm tih a sawi.
Japan hi lirnghing thlen duhna ram niin kum tin vawi 1,500 chuang a nghing ziah.
Kum 2016 khan Kumamoto-a lirnghing na tak awmah mi 278 an lo thi tawh bawk.